தமிழகத்தில் திமுக ஆட்சியை மக்கள் முற்றிலுமாகப் புறக்கணித்துவிட்டனர் என்றும், 2026-இல் அதிமுக தலைமையிலான கூட்டணி அமோக வெற்றி பெற்று ஆட்சியைப் பிடிக்கும் என்றும் அக்கட்சியின் பொதுச்செயலாளர் எடப்பாடி பழனிசாமி உறுதிபடத் தெரிவித்துள்ளார்.

சேலத்தில் இன்று நடைபெற்ற பொங்கல் விழாவில் எதிர்க்கட்சித் தலைவர் எடப்பாடி பழனிசாமி கலந்துகொண்டார். முன்னதாக, விழாவிற்கு அவரே மாட்டு வண்டியை ஓட்டி வந்ததைக் கண்ட கட்சித் தொண்டர்களும் பொதுமக்களும் உற்சாகமடைந்தனர். விழாவில் அவர் ஆற்றிய உரையில் கூறியதாவது, வேடுவ திமுக ஆட்சியில் தமிழகத்தின் நிலைமை மோசமடைந்துள்ளதாகக் குறிப்பிட்ட அவர்,

“தமிழகத்தில் எங்கு பார்த்தாலும் தினமும் போராட்டங்கள் நடைபெறுகின்றன. முதல்வர் ஸ்டாலின் மக்களுக்காக ஒரு துரும்பைக்கூடக் கிள்ளிப்போடவில்லை.

சட்டம்-ஒழுங்கு முழுமையாகச் சீர்குலைந்துவிட்டது. மாணவர்களிடையே போதைப்பொருள் பழக்கம் அதிகரித்து, வன்முறை பெருகியுள்ளது.

நிரந்தர டிஜிபி-யைக் கூட நியமிக்க முடியாத நிலையில் இந்த ஆட்சி இயங்கிக் கொண்டிருக்கிறது” என்று சாடினார்.

“திமுக கூட்டணியில் விரிசல் தொடங்கிவிட்டது. விரைவில் காங்கிரஸும் அந்தக் கூட்டணியிலிருந்து நழுவிச் செல்ல இருக்கிறது. ஆனால், அதிமுக கூட்டணி மிகவும் பலமாக உள்ளது. மேலும் சில பலமான கட்சிகள் விரைவில் எங்களோடு இணைய உள்ளன.”

விவசாயிகள் நலன் குறித்துப் பேசுகையில், அதிமுக ஆட்சியில் இரண்டு முறை வேளாண் கடன்கள் தள்ளுபடி செய்யப்பட்டதை அவர் சுட்டிக்காட்டினார். “திமுகவின் பொய் வாக்குறுதிகளை மக்கள் உணர்ந்துவிட்டனர். அடுத்த ஆண்டு பொங்கல் விழாவை அதிமுகவை ஆளுங்கட்சியாகக் கொண்டாடும்” என்று அவர் நம்பிக்கை தெரிவித்தார்.