சமூக வலைத்தளங்களில் தினந்தோறும் எண்ணற்ற வீடியோக்கள் வைரலாகி வருகின்றன. அதில் சில வீடியோக்கள் பார்ப்பவர்களை அதிர்ச்சியிலும், ஆச்சரியத்திலும் ஆழ்த்தும் வகையில் அமைந்திருக்கும். அந்த வகையில், நகரும் கோல்ஃப் கார்ட் வாகனத்தில் இருந்து தனது தோழியைக் காப்பாற்ற முயன்ற பெண் ஓட்டுநரின் 13 வினாடிகள் மட்டுமே கொண்ட ஒரு குறுகிய வீடியோ, தற்போது இணையத்தில் காட்டுத்தீயாய் பரவி நெட்டிசன்கள் மத்தியில் பெரும் விவாதத்தை ஏற்படுத்தியுள்ளது.

 

அந்த வீடியோவில், வேகமாகச் சென்று கொண்டிருந்த கோல்ஃப் கார்ட் வாகனத்தின் முன்பக்கத்திலிருந்து ஒரு பெண் எதிர்பாராதவிதமாகத் தவறி கீழே விழுகிறார். இதைப் பார்த்த வாகனத்தை ஓட்டி வந்த பெண் ஓட்டுநர், ஒரு நொடி கூட யோசிக்காமல், கீழே விழுந்த தனது தோழியைக் காப்பாற்ற வேண்டும் என்ற நோக்கில் ஓடும் வாகனத்தில் இருந்து தானும் கீழே குதிக்கிறார். அந்தப் பெண்ணின் இந்தத் துணிச்சலான செயல் ஒருபுறம் பாராட்டத்தக்கதாக இருந்தாலும், அதன் பின் நடந்த சம்பவமே அதிர்ச்சியை ஏற்படுத்தியது.

பெண் ஓட்டுநர் வாகனத்தை அப்படியே விட்டுவிட்டுக் குதித்ததால், அந்த கோல்ஃப் கார்ட் வாகனம் ஓட்டுநர் இல்லாமல் தானாகவே முன்னோக்கி வேகமாக நகரத் தொடங்கியது. அப்போது, அந்த வாகனத்தின் பின்பக்க இருக்கையில் மேலும் இரண்டு பேர் அமர்ந்திருந்தனர். ஓட்டுநர் இல்லாததால் கட்டுப்பாட்டை இழந்த அந்த வாகனம், பின்னால் அமர்ந்திருந்தவர்களுடன் வேகமாகச் சென்று மோதி விபத்துக்குள்ளானது.

இந்த 13 வினாடி விபத்து வீடியோ சமூக வலைத்தளங்களில் வைரலானதைத் தொடர்ந்து, நெட்டிசன்கள் இதற்குப் பலதரப்பட்ட கருத்துக்களைத் தெரிவித்து வருகின்றனர். சிலர், ஓட்டுநரின் தோழமை உணர்வையும், ஆபத்தான நேரத்தில் உடனடியாகச் செயல்பட்ட அவரது வேகத்தையும் பாராட்டி வருகின்றனர். அதே நேரத்தில், பின்னால் அமர்ந்திருந்த மற்ற இருவரின் பாதுகாப்பைக் கருத்தில் கொள்ளாமல், ஓடும் வாகனத்தை அப்படியே விட்டுவிட்டுக் குதித்தது மிகப்பெரிய தவறு என்றும் பல நெட்டிசன்கள் தங்களது கண்டனங்களைப் பதிவு செய்து வருகின்றனர்.