மேற்கு ஆஸ்திரேலியாவில் வசித்து வரும் 41 வயதான மலேசியக் குழந்தை நல மருத்துவர், குழந்தைகள் மீதான பாலியல் வன்கொடுமைகள் மற்றும் ஆபாசப் பொருட்களை வைத்திருந்ததாகக் கூறப்படும் 33 கடுமையான குற்றச்சாட்டுகளின் கீழ் காவல்துறையினரால் கைது செய்யப்பட்டுச் சிறையிலடைக்கப்பட்டுள்ளார்.  நீதிமன்றத்தில் ஆஜர்படுத்தப்பட்ட டாக்டர் சா சியா லியாங் (Dr Saw Chia Liang) மீது, போலீசார் நடத்திய தீவிர விசாரணையின் அடிப்படையில் மேலும் 31 புதிய குற்றச்சாட்டுகள் பதிவு செய்யப்பட்டுள்ளன.

இந்த விபரீதச் செயலில் பல குழந்தைகள் பாதிக்கப்பட்டுள்ளதாக அரசுத் தரப்பு வழக்கறிஞர்கள் தெரிவித்துள்ளனர். ஆஸ்திரேலிய பொது ஒளிபரப்பு நிறுவனமான ஏபிசி வெளியிட்டுள்ள தகவலின்படி, இந்த மருத்துவர் தான் பணிபுரிந்த மருத்துவப் பரிசோதனை அறைகளுக்குள் ரகசிய கேமராக்களைப் பொருத்தி, அதன் மூலம் குழந்தைகளின் அந்தரங்க காட்சிகளைத் திருட்டுத்தனமாகப் பதிவு செய்துள்ளார் என்பது அம்பலமாகியுள்ளது. இதன் மூலம் சுமார் எட்டு அல்லது ஒன்பது குழந்தைகள் வரை பாதிக்கப்பட்டிருக்கலாம் எனப் போலீசார் சந்தேகிக்கின்றனர்.

கடந்த 2022 ஆம் ஆண்டு நவம்பர் முதல் 2026 மே மாதம் வரையிலான காலகட்டத்தில், பெர்த் நகரின் பல்வேறு பகுதிகளில் இந்த அநீதிகள் அரங்கேறியுள்ளதாகக் குற்றப்பத்திரிகையில் கூறப்பட்டுள்ளது. கைது செய்யப்படுவதற்கு முன்பு, இவர் பெர்த் நகரில் ஆலோசகர் குழந்தை நல மருத்துவராகவும், கர்டின் பல்கலைக்கழகத்தில் மருத்துவ விரிவுரையாளராகவும் பணியாற்றி வந்துள்ளார். இந்த அதிர்ச்சிகரமான குற்றச்சாட்டுகளைத் தொடர்ந்து, ஆஸ்திரேலிய சுகாதாரப் பயிற்சியாளர் ஒழுங்குமுறை முகமை அவரது மருத்துவப் பதிவை உடனடியாகச் சஸ்பெண்ட் செய்து, அவர் ஆஸ்திரேலியாவில் மருத்துவம் பார்க்கத் தடை விதித்துள்ளது.

 மலேசியாவின் கோலாலம்பூரில் உள்ள சர்வதேச மருத்துவப் பல்கலைக்கழகத்தில் பட்டம் பெற்ற இவரின் இந்தச் செயல், ஏற்கனவே அயர்லாந்து மற்றும் ஆஸ்திரேலியாவில் பாலியல் குற்றங்களுக்காகச் சிறைத்தண்டனை பெற்ற அமீருல் ஆரிஃப் மற்றும் நிக்கோலஸ் சியா ஆகிய மலேசிய மருத்துவர்களின் முந்தைய கொடூரச் சம்பவங்களை நினைவூட்டுவதாக அமைந்துள்ளது. தற்போது ஜாமீன் கோராத நிலையில், இந்த மருத்துவர் ஜூன் 30 ஆம் தேதி வரை போலீஸ் காவலில் வைக்கப்பட்டுத் தீவிர விசாரணைக்கு உட்படுத்தப்பட்டுள்ளார்.