சென்னையில் சம வேலைக்கு சம ஊதியம் என்ற கோரிக்கையை வலியுறுத்தி இடைநிலை ஆசிரியர்கள் மேற்கொண்டு வரும் போராட்டமும், அதே நேரத்தில் பணி நிரந்தரம் உள்ளிட்ட கோரிக்கைகளுக்காகத் தூய்மைப் பணியாளர்கள் முன்னெடுத்துள்ள போராட்டமும் தமிழக அரசுக்கு பெரும் நெருக்கடியை ஏற்படுத்தியுள்ளன.
இது குறிப்பாக, தங்களின் வாழ்வாதாரக் கோரிக்கைகளை நிறைவேற்றக் கோரி ஆசிரியர்கள் சென்னை எழும்பூர் பகுதியில் தொடர் போராட்டத்தில் ஈடுபட்டு வருகின்றனர். திமுகவின் தேர்தல் வாக்குறுதியான ‘சம வேலைக்கு சம ஊதியம்’ என்பதை அமல்படுத்த வேண்டும் என வலியுறுத்தி, ஐந்தாவது நாளாகப் போராட்டம் நீடிப்பதால் சென்னையின் முக்கியப் பகுதிகளில் போக்குவரத்து நெரிசலும், பரபரப்பான சூழலும் நிலவி வருகிறது.
மேலும் மறுபுறம், தூய்மைப் பணிகளைத் தனியார்மயமாக்குவதற்கு எதிர்ப்பு தெரிவித்தும், தங்களைப் பணி நிரந்தரம் செய்யக் கோரியும் தூய்மைப் பணியாளர்கள் சென்னை அண்ணா அறிவாலயத்தை முற்றுகையிட முயன்றனர். இந்தத் திடீர் போராட்டத்தால் அப்பகுதியில் பாதுகாப்பு பலப்படுத்தப்பட்டு, போராட்டத்தில் ஈடுபட்டவர்கள் காவல்துறையினரால் கைது செய்யப்பட்டனர்.
இந்நிலையில் ஆசிரியர்கள் மற்றும் தூய்மைப் பணியாளர்கள் என இருவேறு தரப்பினர் தங்களின் உரிமைகளுக்காகத் தலைநகரில் ஒரே நேரத்தில் வீதியில் இறங்கிப் போராடுவது, நிர்வாக ரீதியாகவும் அரசியல் ரீதியாகவும் திமுக அரசுக்கு ஒரு சவாலான சூழலை உருவாக்கியுள்ளது.
