தமிழக அரசின் தலைமைச் செயலகம், அரசியல் கட்சி ஒன்றின் அலுவலகமாக மாறி வருவதாக பாஜக தேசிய மகளிரணித் தலைவர் வானதி சீனிவாசன் கடுமையாக விமர்சித்துள்ளார். இது குறித்து அவர் வெளியிட்டுள்ள எக்ஸ் பதிவில், மாநிலங்களவை உறுப்பினர் பதவி தொடர்பான கூட்டணிப் பேச்சுவார்த்தைகள் மற்றும் சில அரசியல் சேர்க்கைகள் அரசு அலுவலகமான தலைமைச் செயலகத்தில் நடைபெறுவது கண்டனத்திற்குரியது என்று குறிப்பிட்டுள்ளார்.
மேலும் காங்கிரஸ் மேலிடப் பொறுப்பாளர் கிரீஷ் சோடங்கர் முதலமைச்சர் ஜோசப் விஜய்யைச் சந்தித்துப் பேசியதும், அதிமுக முன்னாள் எம்.எல்.ஏக்கள் அமைச்சர் ஆதவ் அர்ஜூனாவின் அறையில் தவெக-வில் இணைந்ததும் இதற்குச் சான்றாக அவர் சுட்டிக்காட்டியுள்ளார்.
இந்த நிகழ்வுகள் குறித்து கேள்வி எழுப்பியுள்ள வானதி சீனிவாசன், “சென்னை கோட்டையில் இருப்பது தமிழ்நாடு அரசின் தலைமைச் செயலகமா அல்லது தவெக-வின் தலைமை அலுவலகமா?” என்று காட்டமான சந்தேகத்தை முன்வைத்துள்ளார்.
இதனால் அரசு நிர்வாகம் நடைபெற வேண்டிய புனிதமான இடத்தில் அரசியல் பேரங்களும், கட்சி சார்ந்த நடவடிக்கைகளும் அரங்கேறுவது ஜனநாயக மரபுகளுக்கு எதிரானது என்றும், இது போன்ற செயல்பாடுகள் தலைமைச் செயலகத்தின் மீதான நம்பகத்தன்மையையும் மாண்பையும் சிதைப்பதாக அமைந்துள்ளதாகவும் அவர் தனது கடும் அதிருப்தியைப் பதிவு செய்துள்ளார்.
