விஜய்யின் திரைப்பயணத்தில் மிகப்பெரிய பிளாக்பஸ்டர் வெற்றிப் படமான ‘கில்லி’ திரைப்படத்தில் நடித்த பிரபல நடிகர் சிவா காலமானார். இச்செய்தி திரையுலக வட்டாரத்திலும் ரசிகர்கள் மத்தியிலும் பெரும் சோகத்தையும் அதிர்ச்சியையும் ஏற்படுத்தியுள்ளது.
’கில்லி’ திரைப்படத்தின் தொடக்கக் காட்சியில், “ஆல் ஏரியாலையும் ஐயா கில்லி டா” என்ற புகழ்பெற்ற வசனத்தைப் பேசும் காட்சியில் விஜய்யுடன் இணைந்து நடித்து மக்கள் மனதில் நீங்கா இடம் பிடித்தவர் நடிகர் சிவா. இவர் ‘கில்லி’ படத்தில் மட்டுமல்லாமல், ‘குருவி’, ‘மதுர’ உள்ளிட்ட விஜய்யின் பல வெற்றிப் படங்களில் முக்கியக் கதாபாத்திரங்களில் ஏற்று நடித்துத் தன் திறமையை வெளிப்படுத்தியுள்ளார்.
இந்நிலையில், நடிகர் சிவாவின் திடீர் மறைவு குறித்த தகவல் வெளியானதைத் தொடர்ந்து, திரையுலகப் பிரபலங்களும் விஜய் ரசிகர்களும் சமூக வலைதளங்களில் அவருக்குத் தங்களது ஆழ்ந்த இரங்கல்களைத் தெரிவித்து அஞ்சலி செலுத்தி வருகின்றனர்.
