ஈரோடு மாவட்டத்தில் இன்னும் ஒரு வாரத்தில் திருமணம் நடக்கவிருந்த நிலையில், வாலிபர் ஒருவர் விஷம் குடித்து தற்கொலை செய்து கொண்ட கொடூரச் சம்பவம் அப்பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது. ஈரோட்டைச் சேர்ந்த ஞானப்பிரகாஷ் என்ற வாலிபருக்கும், ஒரு பெண்ணுக்கும் இடையே காதல் மலர்ந்து, இருவீட்டாரின் சம்மதத்துடன் இன்னும் ஒரு சில நாட்களில் திருமணம் நடைபெற ஏற்பாடுகள் தீவிரமாக நடந்து வந்தன. திருமணத்திற்கான பத்திரிகை அடித்து உறவினர்களுக்கு வழங்கும் பணிகளும், மற்ற ஏற்பாடுகளும் விறுவிறுப்பாக நடந்து வந்த நிலையில், மணமகன் ஞானப்பிரகாஷ் திடீரென விஷம் குடித்து தனது உயிரை மாய்த்துக் கொண்டுள்ளார்.

அவர் விஷம் குடித்து மயங்கிக் கிடந்ததை பார்த்த குடும்பத்தினர் அதிர்ச்சியடைந்து, உடனடியாக அவரை மீட்டு சிகிச்சைக்காக மருத்துவமனையில் அனுமதித்தனர். ஆனால் அங்கு சிகிச்சை பலனின்றி ஞானப்பிரகாஷ் பரிதாபமாக உயிரிழந்தார். இச்சம்பவம் குறித்துத் தகவல் அறிந்து வந்த போலீசார் வழக்குப் பதிவு செய்து, ஞானப்பிரகாஷின் இந்த விபரீத முடிவிற்கான காரணம் என்ன என்பது குறித்து தீவிர முதற்கட்ட விசாரணையைத் தொடங்கியுள்ளனர். திருமணக் கோலம் காண வேண்டிய வீட்டில், வாலிபரின் மரணத்தால் சொந்த பந்தங்கள் அனைவரும் கண்ணீரில் மூழ்கியுள்ளனர்.