பீகார் மாநிலம் நாளந்தா மாவட்டத்தில், விகாஸ் குமார் என்ற இளைஞன் 5 ஆண்டுகளுக்கு முன்பு சுனிதா தேவி என்ற பெண்ணை இரண்டாவது மனைவியாக திருமணம் செய்துகொண்டார். திருமணத்திற்குப் பிறகு, அவருக்கு ஏற்கனவே ஒரு முதல் மனைவி இருப்பது தெரிந்தாலும், சுனிதாவின் குடும்பத்தினர் அவரை சம்மதிக்க வைத்து விகாஸுடன் வாழ வைத்தனர். இந்தத் தம்பதியினருக்கு இரண்டு குழந்தைகள் பிறந்தன, ஆனால் அவை அடுத்தடுத்து இறந்துவிட்டன. இதனால் குடும்பத்தில் பெரும் மனச்சோர்வு ஏற்பட்டது. குழந்தைகள் இறந்த பிறகு, விகாஸ் குமார் தனக்கு ஒரு காதலி இருப்பதாகவும், அவளைத் திருமணம் செய்யப்போவதாகவும் சுனிதாவிடம் தெரிவித்தார்.

இதை எதிர்த்த சுனிதா, அடிக்கடி சண்டை போட்டு தனது பெற்றோர் வீட்டிற்கு சென்றுவிட்டார். துர்கா பூஜை நிகழ்ச்சியின் போது, விகாஸ் சுனிதாவை தனது வீட்டிற்கு வருமாறு வற்புறுத்தினார். அப்போது ஏற்பட்ட தகராறில், விகாஸ் சுனிதாவின் மீது பெட்ரோல் ஊற்றி தீ வைத்து எரித்துக் கொன்றார். சம்பவத்தை அறிந்த குடும்ப உறுப்பினர்கள் விரைந்து வந்தபோது, விகாஸும் அவரது குடும்பமும் தப்பி ஓடியதாகக் கூறப்படுகிறது. இந்த கொடூர சம்பவம் பீகாரில் பெரும் அதிர்ச்சியை ஏற்படுத்தியுள்ளது. போலீசார் சுனிதாவின் உடலை மீட்டு பிரேதப் பரிசோதனை செய்து, வழக்கு பதிவு செய்துள்ளனர். விகாஸ் குமாரைத் தேடி விசாரணை நடத்தி வருகின்றனர்.