கழுத்தை வலது, இடது பக்கமாகத் திருப்பும்போது அல்லது முறுக்கும்போது ‘சடக்’ அல்லது ‘கிராக்’ என்ற சத்தம் வருவது பலருக்கும் ஏற்படும். சிலர் இந்தச் சத்தம் வந்த பிறகு கழுத்து லேசாகவும், இறுக்கம் குறைந்தது போலவும் உணர்வதால், அதை மீண்டும் மீண்டும் செய்யும் பழக்கத்தை ஏற்படுத்திக் கொள்கின்றனர். ஆனால் அடிக்கடி கழுத்தை தானாக முறுக்குவது சரியான பழக்கமா என்ற கேள்வி எழுகிறது.

கழுத்தில் உள்ள மூட்டுகளை அசைக்கும்போது, மூட்டுக்குள் இருக்கும் திரவத்தில் அழுத்த மாற்றம் ஏற்படுவதால் சத்தம் உருவாகலாம். சில நேரங்களில் தசைகள் அல்லது தசைநார்கள் எலும்புப் பகுதிகளை கடந்து நகர்வதாலும் சத்தம் கேட்கலாம். எனவே கழுத்தில் சத்தம் வந்தாலே எலும்பு தேய்ந்துவிட்டது அல்லது பெரிய பாதிப்பு ஏற்பட்டுவிட்டது என்று அர்த்தமல்ல.

ஆனால் கழுத்தை அதிகமாகவும், பலமாகவும், மீண்டும் மீண்டும் முறுக்குவது நல்ல பழக்கம் அல்ல. குறிப்பாக திடீரென அதிக அழுத்தம் கொடுத்து கழுத்தைத் திருப்புவது தசை அல்லது மூட்டு பகுதிகளில் பாதிப்பை ஏற்படுத்தக்கூடும். கழுத்து வலி, தலைச்சுற்றல், கை அல்லது விரல்களில் உணர்வின்மை, பலவீனம் போன்ற அறிகுறிகளுடன் சத்தம் தொடர்ந்து ஏற்பட்டால் அதை அலட்சியம் செய்யக்கூடாது.

நீண்ட நேரம் கணினி அல்லது செல்போனைப் பயன்படுத்துவதால் கழுத்தில் இறுக்கம் ஏற்படுபவர்கள், அதை சடக்கென்று முறுக்குவதற்குப் பதிலாக சரியான உட்காரும் நிலை, இடையிடையே ஓய்வு மற்றும் மென்மையான கழுத்துப் பயிற்சிகளுக்கு முக்கியத்துவம் கொடுக்கலாம். வலி அல்லது வேறு அறிகுறிகள் தொடர்ந்து இருந்தால் மருத்துவர் அல்லது உடற்பயிற்சி நிபுணரிடம் ஆலோசனை பெறுவது பாதுகாப்பானது.