கர்நாடக மாநிலம் பெலகாவி மாவட்டத்தில், திரைப்பட பாணியிலான ஒரு அதிர்ச்சியூட்டும் கொலைக் குற்றம் அரங்கேறியுள்ளது.  சந்தீப் மாஞ்சரகி என்ற முன்னாள் ராணுவ வீரர், மார்ச் 13 அன்று ஒரு சிறிய இருசக்கர வாகன விபத்தில் சிக்கி மருத்துவமனையில் அனுமதிக்கப்பட்டார்.

மேலும் பெரிய காயங்கள் ஏதும் இல்லாத நிலையிலும், மார்ச் 15 அன்று அவர் திடீரென மாரடைப்பால் உயிரிழந்ததாக மருத்துவமனை பதிவுகள் கூறின. தொடக்கத்தில் இது ஒரு இயற்கை மரணம் என்று கருதப்பட்ட நிலையில், சந்தீப்பின் மனைவி சுமா மற்றும் அவரது கள்ளக்காதலன் புண்டலிக் டோம்பார் ஆகியோரின் சமூக ஊடகப் பதிவு ஒன்றின் மூலம் போலீசாருக்கு சந்தேகம் எழுந்தது.

இதனை தொடர்ந்து போலீசார் நடத்திய தீவிர விசாரணையில், சந்தீப் பெயரில் இருந்த 2 கோடி ரூபாய் காப்பீட்டு பணத்தை அடைவதற்காகவே இந்த கொலைத் திட்டம் தீட்டப்பட்டது அம்பலமானது. சுமாவும் புண்டலிக்கும் இணைந்து, சந்தீப் சிகிச்சை பெற்று வந்த மருத்துவமனை ஊழியர்கள் சிலரைத் தங்கள் வசப்படுத்தி, அவர் செலுத்தப்பட்டு வந்த குளுக்கோஸ் பாட்டிலில் விஷம் மற்றும் தூக்க மாத்திரைகளைக் கலந்து கொடுத்துக் கொலை செய்துள்ளனர்.

இந்த குற்றத்தை மூடிமறைக்க மருத்துவ அறிக்கை மற்றும் பிரேதப் பரிசோதனை முடிவுகளை மாற்றியமைக்க அரசு அதிகாரிகள் மற்றும் ஆய்வக ஊழியர்களும் உதவியுள்ளனர். தற்போது இந்த கொடூரச் சதித் திட்டத்தில் தொடர்புடைய மனைவி, கள்ளக்காதலன் உட்பட மொத்தம் 9 பேரை போலீசார் கைது செய்து விசாரித்து வருகின்றனர்.