கர்நாடக மாநிலம் கொப்பல் மாவட்டம் கனுமனகட்டே கிராமத்தைச் சேர்ந்த கரியப்பா மடிவாளா (26), காரடகி தாலுகா முஸ்டூரு கிராமத்தைச் சேர்ந்த கவிதா (19) ஆகியோருக்கு கடந்த நான்கு மாதங்களுக்கு முன்பு இரு குடும்பங்களும் திருமணம் பேசி உறுதி செய்திருந்தனர். வரும் 20-ஆம் தேதி கொப்பலில் திருமணம் நடைபெறுவதாக இருந்தது.

திருமணம் நெருங்கிய நிலையில், மணமக்கள் இருவரும் முன்கூட்டியே பல்வேறு இடங்களில் போட்டோஷூட் மேற்கொள்ள தீர்மானித்தனர். இதற்கு அவர்களது குடும்பத்தினரும் சம்மதம் தெரிவித்தனர். இதன்படி, நேற்று முன்தினம் பல்லாரி மாவட்டம் ஒசப்பேட்டே, உம்னாபாத் உள்ளிட்ட பகுதிகளுக்கு மோட்டார் சைக்கிளில் சென்ற கரியப்பா–கவிதா ஜோடி, பல்வேறு போஸ்களில் திருமண முன்பதிவு புகைப்படங்களை எடுத்து மகிழ்ந்தனர்.

ஆனால், மகிழ்ச்சி நீடிக்கவில்லை. போட்டோஷூட் முடிந்தபின், கவிதாவை வீட்டிற்கு அழைத்துச் செல்வதற்காக கரியப்பா தனது மோட்டார் சைக்கிளில் பயணம் செய்தார். இரவு நேரத்தில் கங்காவதி அருகே சிக்கபெனகல் கிராமம் வழியாக வந்தபோது, சாலையோரம் பழுதாக நின்றிருந்த ஒரு லாரியை தவிர்க்கும் நோக்கில் கரியப்பா நடுவழியில்  சென்றார்.

அந்நேரத்தில் எதிர்திசையில் வந்த மற்றொரு லாரி மோட்டார் சைக்கிளில் நேரடியாக மோதியது. மோதலின் பேரிலே கரியப்பாவும் கவிதாவும் சாலையில் தூக்கி எறியப்பட்டனர். இதில், கவிதா சம்பவ இடத்திலேயே உயிரிழந்தார். ஆஸ்பத்திரிக்கு அழைத்துச் செல்லும் வழியில் கரியப்பாவும் உயிரிழந்தார்.

திடீர் விபத்து செய்தி அறிந்த இரு குடும்பங்களும் சம்பவ இடத்துக்கு விரைந்து வந்து, மணமக்களின் உடல்களைப் பார்த்து கதறி அழுதனர். எதிர்வரும்  திருமணம் இரட்டை இறப்பாக மாறியதால், கிராமம் முழுவதும் துயரச் சூழல் நிலவுகிறது. கங்காவதி புறநகர் போலீசார் சம்பவ இடத்திற்கு வந்து உடல்களை மீட்டு பிரேத பரிசோதனைக்காக மாவட்ட அரசு ஆஸ்பத்திரிக்கு அனுப்பினர். மேலும், லாரி டிரைவரை தேடி வருவதாக தெரிவித்தனர்.

திருமணத்திற்கான முன்னேற்பாடுகளில் மகிழ்ச்சியுடன் போட்டோஷூட் செய்து கொண்டிருந்த மணமக்கள், வீடு திரும்பும் வழியிலேயே விபத்தில் பலியானது, அப்பகுதி மக்களிடையே பெரும் சோகத்தை ஏற்படுத்தியுள்ளது. இவர்களின் போட்டோஷூட் புகைப்படங்கள் சமூக வலைதளங்களில் வைரலாகிக் கொண்டிருக்கின்றன