தெலங்கானா மாநிலம் ராஜன்னா சிர்சில்லா மாவட்டத்தைச் சேர்ந்த பிரபல கைத்தறி நெசவாளரான நல்லா விஜய் குமார், தனது அபார திறமையால் தீப்பெட்டிக்குள் அடங்கக்கூடிய ஒரு விந்தையான பட்டுச் சேலையை நெய்து சாதனை படைத்துள்ளார்.

மேலும் சுமார் 5.5 மீட்டர் நீளமும், 48 இன்ச் அகலமும் கொண்ட இந்த முழு நீளப் பட்டுச் சேலை, வெறும் 200 கிராம் எடையை மட்டுமே கொண்டுள்ளது. பாரம்பரிய இகாத் வடிவமைப்பைக் கொண்டு, முற்றிலும் கைத்தறியால் நெய்யப்பட்ட இந்த அரிய சேலையை ஒரு வாரம் தொடர் முயற்சி செய்து அவர் உருவாக்கியுள்ளார்.

இந்த வியக்கத்தக்க படைப்பை, ஆந்திர மாநிலம் விஜயவாடாவில் உள்ள புகழ்பெற்ற இந்திரகீலாத்ரி கனக துர்க்கை அம்மன் ஆலயத்திற்குச் சென்று, அம்மனுக்கு அணிவிப்பதற்காக அங்கிருந்த அதிகாரிகளிடம் அவர் பக்திப்பரவசத்துடன் சமர்ப்பித்துள்ளார்.

இதனால் கைத்தறித் துறையில் ‘கைத்தறி கலா ரத்னா’ விருது பெற்ற விஜய் குமார், தனது தந்தையான மறைந்த மாபெரும் நெசவுக் கலைஞர் நல்லா பரந்தாமுலுவின் வழியைப் பின்பற்றி இத்தகைய புதிய நெசவு நுட்பங்களை உலகிற்கு வெளிப்படுத்தி வருகிறார். நுணுக்கமான மடிப்பு முறைகளைப் பயன்படுத்தி, முழுச் சேலையையும் ஒரு சிறிய தீப்பெட்டிக்குள் வைக்கும் அளவுக்குச் சுருக்க முடியும் என்பது இத்துறையில் உள்ள தொழில்நுட்ப நிபுணத்துவத்தைக் காட்டுகிறது.

இதற்கு முன்னதாக, இவர் நெய்த ‘ஆபரேஷன் சிந்தூர்’ என்ற கருப்பொருளிலான சிறப்புப் பொன்னாடை, பாரதப் பிரதமர் நரேந்திர மோடிக்கு வழங்கப்பட்டுப் பாராட்டுகளைப் பெற்றது குறிப்பிடத்தக்கது. இந்தியாவின் பாரம்பரிய கைத்தறி கலையின் பெருமையையும், நெசவாளர்களின் உழைப்பையும் உலகிற்குப் பறைசாற்றும் விதமாக இந்த அரிய பட்டுச் சேலை அமைந்துள்ளது.