உத்தரப் பிரதேச மாநிலம் அம்ரோகா மாவட்டம், அசன்ஜ்பூர் பகுதியைச் சேர்ந்த தௌரியா கிராமத்தில் சமூக வலைதளங்களில் மிகவும் பிரபலமான மூன்று உடன் பிறந்த சகோதரிகள் வசித்து வருகின்றனர். சரோஜ் (20), சாவித்திரி (19) மற்றும் சந்தோஷி (18) ஆகிய இந்த மூன்று சகோதரிகளும் இன்ஸ்டாகிராமில் 4.69 லட்சத்திற்கும் அதிகமான ஃபாலோயர்களைக் கொண்டு தொடர்ந்து வீடியோக்களை வெளியிட்டு வந்துள்ளனர். இந்நிலையில், தங்களது வீடியோக்களுக்கு கடந்த 6 மாதங்களாக கேமராமேனாகவும், வீடியோக்களில் கணவராகவும் நடித்து வந்த விகாஸ் என்ற வாலிபரை, இம்மூன்று சகோதரிகளும் ஒரே நேரத்தில் காதலிக்கத் தொடங்கியுள்ளனர்.

பெற்றோர்கள் தங்களுக்கு தனித்தனியாக வேறு இடங்களில் மாப்பிள்ளை பார்க்கத் தொடங்கியதை அறிந்த இந்தச் சகோதரிகள், தாங்கள் ஆயுள் முழுவதும் பிரியக் கூடாது என்ற முடிவை எடுத்தனர். இதற்காகத் தங்களது கேமராமேன் விகாஸையே திருமணம் செய்து கொள்ளத் திட்டமிட்டனர். கடந்த ஜூலை 17-ஆம் தேதி, அருகில் உள்ள சாமுண்டா மாதா கோயிலுக்குச் சென்ற இவர்கள், யாருடைய முன்னிலையும் இன்றி, விகாஸ் மூலம்  ஒரே நாளில் சிந்தூரம் இடச் செய்து முறைப்படி திருமணம் செய்து கொண்டனர். இந்தத் திருமண வீடியோ சமூக வலைதளங்களில் காட்டுத்தீயாகப் பரவியதைத் தொடர்ந்து அப்பகுதியில் பெரும் பரபரப்பு ஏற்பட்டது.

பொதுவெளியில் இந்த வீடியோ வைரலானதைத் தொடர்ந்து, உள்ளூர் சமூக அமைப்புகளும், இந்துத்துவ அமைப்புகளும் இதற்கு கடுமையான எதிர்ப்பைப் பதிவு செய்தனர். சனாதன தர்மத்திற்கும், சமூக நெறிமுறைகளுக்கும் மாறாக இந்தத் திருமணம் நடந்துள்ளதாகக் கூறி காவல் நிலையத்திலும் புகார் அளித்தனர். இதற்கிடையே, கோயில் நிர்வாகம் தரப்பில் பேசுகையில், புனரமைப்புப் பணிகள் நடந்து கொண்டிருந்தபோது, பூசாரி இல்லாத நேரத்தில் இச்சம்பவம் நடந்துள்ளதாகத் தெளிவுபடுத்தப்பட்டது. காவல்துறையினரும் இதுகுறித்து தீவிர விசாரணை மேற்கொண்டு வருகின்றனர்.

தங்களுக்கு எதிராகக் கிளம்பிய எதிர்ப்புகளுக்குப் பதிலளிக்கும் வகையில், அந்த மூன்று சகோதரிகளும் புதிய வீடியோ ஒன்றை வெளியிட்டு தங்களது தரப்பு நியாயத்தை விளக்கியுள்ளனர். அதில், “நாங்கள் மூவரும் சிறுவயதிலிருந்தே ஒன்றாக வளர்ந்தவர்கள்; ஒருவரை விட்டு ஒருவர் பிரிய முடியாது என்பதற்காகவே ஒரே நபரைத் திருமணம் செய்தோம். ராமரின் தந்தை தசரத மன்னருக்குக்கூட மூன்று மனைவிகள் இருந்தனர். நாங்கள் அனைவரும் 18 வயதைக் கடந்த சுய அறிவோடு இருக்கும் இந்தியக் குடிமக்கள். எங்கள் விருப்பத்தின் பேரிலேயே இந்தத் திருமணம் நடந்துள்ளது” என்று அதிரடியாகத் தெரிவித்துள்ளனர். சட்டப்பூர்வ வயது அடைந்ததால் தங்கள் முடிவில் உறுதியாக இருப்பதாக அவர்கள் தெரிவித்த நிலையில், காவல் துறை மேற்கொண்டு விசாரணை நடத்தி வருகிறது.