ஈரானின் ஏவுகணைத் திட்டங்கள் அமெரிக்காவுடனான ஒப்பந்தத்தின் ஒரு பகுதியாக இல்லை என்றும், ஈரான் தனது பாலிஸ்டிக் ஏவுகணைத் திறனைத் தக்கவைத்துக்கொள்ள முழு உரிமை உண்டு என்றும் பாகிஸ்தான் பிரதமர் ஷெபாஸ் ஷெரீப் தெரிவித்துள்ளார்.
இஸ்லாமாபாத்தில் ஈரான் அதிபர் மசூத் பெசெஷ்கியனுடன் இணைந்து செய்தியாளர்களைச் சந்தித்த ஷெரீப், ஏவுகணை விவகாரத்தில் இரட்டை வேடத்தைப் பின்பற்றக்கூடாது என்று எச்சரித்தார். பிற நாடுகளுக்கு இருக்கும் அதே உரிமை ஈரானுக்கும் உண்டு என்று கூறிய அவர், ஈரான்-அமெரிக்கா இடையிலான போர் நிறுத்த ஒப்பந்தம் கண்ணியத்துடனும் மரியாதையுடனும் எட்டப்பட்டுள்ளதாகப் பாராட்டினார்.
இந்த அமைதி ஒப்பந்தத்தை எட்ட பாகிஸ்தான் ஆற்றிய பங்களிப்பையும், குறிப்பாக பாகிஸ்தான் ராணுவத் தளபதி ஆசிம் முனிரின் அயராத முயற்சியையும் அவர் இந்தச் சந்திப்பில் நினைவு கூர்ந்தார். பிராந்திய அமைதியைப் பேணுவதற்கும், இரு நாடுகளுக்கும் இடையிலான ஒத்துழைப்பை ஆழப்படுத்துவதற்கும் பாகிஸ்தான் எப்போதும் ஈரானின் நம்பகமான சகோதர நாடாகத் திகழும் என்று அவர் உறுதியளித்தார்.
இந்த அமைதி ஒப்பந்தத்தைத் தடம் புரளச் செய்ய உலகளவில் சில சக்திகள் முயற்சிப்பதாக எச்சரித்த ஷெரீப், ஈரானின் பொருளாதார எதிர்காலம் மிகவும் பிரகாசமாக இருக்கும் என்றும் நம்பிக்கை தெரிவித்தார்.
