கோவையில் இளம்பெண் ஒருவர் பாலியல் வன்கொடுமை செய்யப்பட்டு கொலை செய்யப்பட்ட வழக்கில், குற்றம் நிரூபிக்கப்பட்ட நபருக்கு ஆயுள் சிறைத் தண்டனை விதித்து கோவை அனைத்து மகளிர் நீதிமன்றம் தீர்ப்பளித்துள்ளது.

புதுக்கோட்டை மாவட்டம், அறந்தாங்கி பகுதியைச் சேர்ந்த ஜெகன் என்பவர், தனது மனைவியுடன் கோவையில் வசித்து வந்தார். தனியார் நிறுவனத்தில் பணியாற்றி வந்த அவர், மனைவியின் வேலை வாயிலாக ஓர் இளம்பெண்ணுடன் அறிமுகம் பெற்றதாக காவல் துறை தரப்பில் தெரிவிக்கப்பட்டது. அந்த இளம்பெண், சாய்பாபா காலனியில் உள்ள பழக்கடையில் ஜெகனின் மனைவியுடன் சேர்ந்து பணியாற்றி வந்தார்.

பின்னர் அந்த அறிமுகம் அடிக்கடி தொலைபேசி உரையாடல்களாக மாறி, ஜெகன் குடும்பத்தில் கருத்து வேறுபாடுகள் உருவாகக் காரணமானதாக கூறப்படுகிறது. இந்நிலையில், 2021ஆம் ஆண்டு சம்பந்தப்பட்ட இளம்பெண்ணின் பிறந்த நாளில், ஜெகனுக்கு கை கடிகாரம் ஒன்றை பரிசளித்ததாகவும், அதன்பின்னர் அவர்களுக்கிடையேயான தொடர்பு அதிகரித்ததாகவும் விசாரணையில் தெரியவந்தது.

ஒரு கட்டத்தில், அந்த இளம்பெண் வீட்டில் தனியாக இருப்பதை அறிந்த ஜெகன், அவரது வீட்டிற்கு சென்றுள்ளார். அப்போது, உன்னை விரும்புவதாக கூறி, மனைவியை விவாகரத்து செய்து திருமணம் செய்து கொள்வதாக வாக்குறுதி அளித்ததாகவும் கூறப்படுகிறது. ஆனால், அந்த இளம்பெண் இதனை மறுத்து, வீட்டை விட்டு வெளியேறுமாறு கூறியதாக தெரிகிறது.

இதனால் ஆத்திரமடைந்த ஜெகன், அந்த இளம்பெண்ணை பாலியல் வன்கொடுமை செய்து, கழுத்தை நெரித்து கொலை செய்ததாக காவல் துறை விசாரணையில் தெரியவந்துள்ளது. பின்னர் அவர், இருசக்கர வாகனத்தில் அங்கிருந்து தப்பிச் சென்றுள்ளார்.

சம்பவத்துக்குப் பிறகு, இளம்பெண்ணின் தங்கை வீட்டிற்கு வந்தபோது, சகோதரி உயிரிழந்த நிலையில் கிடந்ததை பார்த்து அதிர்ச்சியடைந்து காவல் துறைக்கு தகவல் அளித்துள்ளார். அதன் பேரில்,  காவல் துறையினர் சம்பவ இடத்திற்கு சென்று உடலை கைப்பற்றி பிரேத பரிசோதனைக்காக அனுப்பினர். தொடக்கத்தில் சந்தேக மரணம் என வழக்குப் பதிவு செய்யப்பட்ட நிலையில், பிரேத பரிசோதனை அறிக்கையின் அடிப்படையில் பாலியல் வன்கொடுமை செய்து கொலை செய்யப்பட்டிருப்பது உறுதி செய்யப்பட்டது.

இதையடுத்து, வழக்கில் கற்பழிப்பு மற்றும் கொலை ஆகிய சட்டப் பிரிவுகள் சேர்க்கப்பட்டன. தனிப்படை காவல் துறையினர் மேற்கொண்ட விசாரணையில், சம்பவ நாளன்று ஜெகன் அந்த வீட்டுக்கு வந்தது கண்காணிப்பு கேமரா பதிவுகள் மூலம் உறுதி செய்யப்பட்டது. கைது செய்யப்பட்ட ஜெகன், விசாரணையில் குற்றத்தை ஒப்புக்கொண்டதாக காவல் துறை தெரிவித்தது.

இந்த வழக்கு கோவை அனைத்து மகளிர் நீதிமன்றத்தில் நடைபெற்று வந்த நிலையில், வழக்கை விசாரித்த நீதிபதி, ஜெகன் மீது சுமத்தப்பட்ட குற்றங்கள் நிரூபிக்கப்பட்டதாகக் கருதி, அவருக்கு ஆயுள் சிறைத் தண்டனை விதித்து தீர்ப்பளித்தார்.

மேலும் இந்த தீர்ப்பு, பெண்கள் மீதான வன்முறைக்கு எதிரான சட்ட நடவடிக்கைகளில் முக்கியமானதாக கருதப்படுகிறது.