ஈரானுக்கு எதிரான ராணுவ நடவடிக்கைகளில் உலக நாடுகள் தங்களுடன் கைகோர்க்க வேண்டும் என்று இஸ்ரேல் பிரதமர் பெஞ்சமின் நெதன்யாகு பகிரங்கமாக அழைப்பு விடுத்துள்ளார். ஈரானின் செயல்பாடுகள் இஸ்ரேல் மற்றும் அமெரிக்காவிற்கு மட்டுமல்லாமல், ஐரோப்பா உள்ளிட்ட ஒட்டுமொத்த உலக நாடுகளின் பாதுகாப்பிற்கும் பெரும் அச்சுறுத்தலாக விளங்குவதாக அவர் குறிப்பிட்டுள்ளார்.

மேலும் தெற்கு இஸ்ரேலில் இருந்து உரையாற்றிய அவர், ஈரான் உலகத்தையே ஆபத்தில் ஆழ்த்துவதாகவும், மற்ற நாட்டுத் தலைவர்கள் இந்த போரில் இணைய வேண்டிய தருணம் இது என்றும் வலியுறுத்தினார். கடந்த சில வாரங்களாக அமெரிக்கா மற்றும் இஸ்ரேல் படைகள் ஈரான் மீது கூட்டுத் தாக்குதல்களை நடத்தி வரும் நிலையில், ஈரானும் பதிலடி கொடுத்து வருகிறது.

இதனால் ஏறத்தாழ 20 நாட்களுக்கும் மேலாக நீடித்து வரும் இந்தப் போரில் ஈரானின் முக்கியத் தலைவர்கள் பலர் கொல்லப்பட்ட போதிலும், ஈரான் தொடர்ந்து தாக்குதலில் ஈடுபட்டு வருகிறது. சில நாடுகள் தங்களுக்கு ஆதரவாகச் செயல்படத் தொடங்கியிருப்பது மகிழ்ச்சி அளிப்பதாகத் தெரிவித்த நெதன்யாகு, ஈரானை முழுமையாகக் கட்டுப்படுத்த இன்னும் கூடுதலான நாடுகளின் ஆதரவு அவசியம் என்று தனது உரையில் சுட்டிக்காட்டினார்.