புதிய அரசின் முதல் சட்டப்பேரவைக் கூட்டத்தொடர் நேற்று ஆளுநர் விஸ்வநாத் ஆர்லேகர் உரையுடன் தொடங்கியது. இந்த நிகழ்வில் தமிழ்த்தாய் வாழ்த்து முதலில் பாடப்பட்டு, இறுதியில் தேசிய கீதம் பாடப்பட்ட நடைமுறை குறித்து எதிர்க்கட்சித் தலைவர் உதயநிதி ஸ்டாலின் கேள்வி எழுப்பியுள்ளார்.

ஆளுநர் உரையில் எந்த மாற்றமும் இன்றி வாசித்திருப்பதும், இரண்டு முறை தேசிய கீதம் பாடப்பட்டதும் ஆளும் தவெக மற்றும் பாஜக இடையிலான ரகசியப் புரிதலை உறுதிப்படுத்துவதாக அவர் விமர்சித்துள்ளார்.

இதற்குப் பதிலளித்த சபாநாயகர் ஜே.சி.டி. பிரபாகர், தமிழ்த்தாய் வாழ்த்து முதலில் பாடப்பட்டது மகிழ்ச்சியளிப்பதாகவும், இதில் எந்தத் தவறான நடைமுறையும் இல்லை என்றும் விளக்கமளித்துள்ளார்.

இதனைத் தொடர்ந்து செய்தியாளர்களைச் சந்தித்த அமைச்சர் அருண்ராஜ், கடந்த காலங்களில் திமுக மற்றும் அப்போதைய ஆளுநர் ஆர்.என். ரவி ஆகியோர் தேசிய கீத விவகாரத்தை வைத்து நாடகம் ஆடியதாகக் கடுமையாகச் சாடியுள்ளார்.

சமூக நீதி, மாநில உரிமை மற்றும் மதச்சார்பின்மை ஆகிய கொள்கைகளில் திமுகவின் பாதையிலேயே தாங்கள் பயணிப்பதாகக் குறிப்பிட்ட அவர், உண்மையில் பாஜகவின் ‘பி’ டீமாக செயல்பட்டது திமுகதான் என்று குற்றம் சாட்டியுள்ளார்.

எந்தவிதப் பிரச்சனையும் இன்றி தற்போதைய சட்டப்பேரவை நிகழ்வைச் சிறப்பாக நடத்தியுள்ளதாகத் தெரிவித்த அவர், திமுகவின் விமர்சனங்களை முற்றிலும் நிராகரித்துள்ளார்.