தமிழ்நாடு சட்டப்பேரவை வளாகத்தில் செய்தியாளர்களைச் சந்தித்த அதிமுக முன்னாள் அமைச்சர் சி.வி.சண்முகம், கட்சித் தலைமை மற்றும் தற்போதைய கள நிலவரம் குறித்துப் பேசி பெரும் பரபரப்பை ஏற்படுத்தியுள்ளார். எடப்பாடி பழனிசாமி அதிமுகவின் பொதுச்செயலாளராகப் பொறுப்பேற்றதில் இருந்து கட்சி சந்தித்த தொடர் தோல்விகளைச் சுட்டிக்காட்டி அவர் கடுமையான விமர்சனங்களை முன்வைத்தார்.

எடப்பாடி பழனிசாமியின் செல்வாக்கால்தான் 47 தொகுதிகளில் வெற்றி கிடைத்ததாகக் கூறப்படுவதைக் குறிப்பிட்ட அவர், அப்படியென்றால் மீதமுள்ள தொகுதிகளில் கட்சியின் தலைமை செல்லாக் காசாகிவிட்டதா என்று கேள்வி எழுப்பினார். ​மேலும் பேசிய அவர், கட்சியின் தோல்விகளுக்குப் பொறுப்பேற்பதில் உள்ள முரண்பாடுகளை வெளிப்படையாகத் தோலுரித்துக் காட்டினார்.

தேர்தலில் வெற்றி பெற்றால் அதற்கு எடப்பாடி பழனிசாமியே காரணம் என்றும், தோற்றுப்போனால் அதற்கெல்லாம் மாவட்டச் செயலாளர்கள்தான் காரணம் என்றும் சொல்வது எந்த விதத்தில் நியாயம் என ஆவேசத்துடன் வினவினார். எடப்பாடி பழனிசாமிக்கு அவரது சொந்த மாவட்டமான சேலத்திலேயே செல்வாக்கு இல்லை என்பதைத் தரவுகளோடு சுட்டிக்காட்டிய அவர், தென் மாவட்டங்கள் மற்றும் சென்னை சுற்றியுள்ள பகுதிகளில் கட்சியின் பின்னடைவை அடுக்கடுக்காகப் பட்டியலிட்டார்.

​குறிப்பாக, தென் மாவட்டங்களில் வெறும் 3 தொகுதிகளில் மட்டுமே கட்சி வெற்றி பெற்றுள்ளதாகவும்; சென்னை, காஞ்சிபுரம், திருவள்ளூர் ஆகிய மாவட்டங்களில் உள்ள 37 தொகுதிகளில் இரண்டில் மட்டுமே வெற்றி கிடைத்துள்ளதாகவும் அவர் கூறினார். தலைநகர் சென்னையில் அதிமுக ஒட்டுமொத்தமாகத் துடைத்து எறியப்பட்டுள்ள நிலையில், இந்த வரலாற்றுத் தோல்விக்கு யார் பொறுப்பேற்பது என்ற கேள்வியையும் அவர் எழுப்பினார்.

வட மாவட்டங்களில் பாமக கூட்டணியால் மட்டுமே 34 தொகுதிகளில் வெற்றி பெற முடிந்ததே தவிர, தனித்த செல்வாக்கால் அல்ல என்பதையும் அவர் தெளிவுபடுத்தினார். நாங்கள் எடப்பாடி பழனிசாமியை பொதுச்செயலாளர் பதவியில் இருந்து ராஜினாமா செய்யச் சொல்லவில்லை என்றும், தோல்விக்கான உண்மையான காரணங்களை ஆராய்ந்து கட்சியை மீட்டெடுக்கவே வலியுறுத்துவதாகவும் அவர் தெரிவித்தார்.

காங்கிரஸ் தோல்விக்கு ராகுல் காந்தி பொறுப்பேற்றது போல நாங்கள் இபிஎஸை விலகச் சொல்லவில்லை; உண்மை நிலவரத்தைக் கலந்து பேசுவோம் என்று சொன்னதற்காக எங்கள் மீது பழி போடுவது ஏமாற்றமளிப்பதாகக் கூறி முடித்தார். சி.வி.சண்முகத்தின் இந்த அதிரடி பேச்சு தற்போது அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது.