குடும்பத்தை அரவணைக்க வேண்டியவரே, கைவிட்ட வாழ்க்கைத் துணையை நடுரோட்டில் தவிக்கவிட்டால் அரசு பார்த்துக் கொண்டிருக்குமா? நிச்சயமாக இல்லை என்பதற்கு அசாம் மாநில அரசு எடுத்துள்ள இந்த அதிரடி நடவடிக்கையே ஒரு மிரட்டலான சாட்சி.

அசாம் மாநிலத்தில் பலதார திருமணங்களுக்கு எதிராக முதல்வர் ஹிமந்தா பிஸ்வா சர்மா தலைமையிலான அரசு ஏற்கனவே பல்வேறு சக்கரங்களை சுழற்றி வரும் நிலையில், தற்போது மேலும் ஒரு படி மேலே சென்று குடும்பங்களை நடுத்தெருவில் விடாமல் காக்கும் புதிய திட்டத்திற்கு உருவம் கொடுத்துள்ளது. அதாவது முதல் மனைவியை முறையாக விவாகரத்து செய்யாமல், சட்டத்திற்குப் புறம்பாக இரண்டாவது திருமணம் செய்துகொள்ளும் அரசு ஊழியர்களுக்கு இனி சம்பளத்தில் பெரும் அடி விழும். ஆம்! அத்தகையவர்களின் மாதச் சம்பளத்திலிருந்து 20 சதவீதம் அதிரடியாகப் பிடித்தம் செய்யப்படும்.

இந்த விவகாரத்தில் ஒரு சுவாரசியமான மற்றும் பாதிக்கப்பட்ட மனைவிகளுக்குப் பாதுகாப்பான விஷயம் என்னவென்றால், பிடித்தம் செய்யப்படும் அந்தத் தொகை நேராக முதல் மனைவியின் வங்கிக் கணக்கிற்கே அனுப்பி வைக்கப்படும். இந்த நன்மையை அடைவதற்கு முதல் மனைவி சும்மா இருக்க முடியாது; அரசிடம் இதற்காக அதிகாரப்பூர்வமாக விண்ணப்பிக்க வேண்டும்.

ஒருவேளை கணவன்-மனைவிக்கு இடையேயான விவாகரத்து வழக்கு இன்னும் நீதிமன்றத்தில்  இருந்தாலும் கூட, இந்தச் சம்பளப் பிடித்தம் தடைபடாமல் தொடர்ந்து நடக்கும். நீதி கிடைக்கும் வரை முதல் மனைவி எந்தவொரு நிதிச் சிரமமும், வறுமையும் சந்திக்கக் கூடாது என்பதே இந்தச் சட்டத்தின் முக்கிய நோக்கமாகும் என்று முதல்வர் ஹிமந்தா பிஸ்வா சர்மா திட்டவட்டமாகத் தெரிவித்துள்ளார்.

தற்போது இந்த அதிரடி விதிகள் அரசு ஊழியர்களுக்கு மட்டுமே அமல்படுத்தப்பட்டிருந்தாலும், எதிர்காலத்தில் இந்தத் திட்டத்தை தனியார் துறை ஊழியர்களுக்கும் விரிவுபடுத்த மாநில அரசு தீவிரமாகத் திட்டமிட்டு வருகிறது. இதன் மூலம் குடும்பத்தைக் கைவிடும் ஆண்களுக்கு அனைத்துத் துறைகளிலும் ஒரு நடுக்கம் ஏற்படும் என்பதில் ஐயமில்லை.

மனைவிகளை மட்டுமல்ல, வயதான பெற்றோரைக் கைவிடும் மகன்களின் மீதும் அசாம் அரசு பாய்ந்துள்ளது. அரசு ஊழியர்கள் தங்களின் வயதான பெற்றோரையும், மாற்றுத்திறனாளி உடன்பிறப்புகளையும் சரியாகப் பராமரிக்காமல் புறக்கணித்தால், அவர்களின் சம்பளத்தில் இருந்து 10 சதவீதம் பிடிக்கப்பட்டு நேரடியாக அந்தப் பெற்றோரின் வங்கிக் கணக்கிற்கே செலுத்தப்படும் நடைமுறை ஏற்கனவே அங்கு அமலில் உள்ளது குறிப்பிடத்தக்கது.