தமிழக அரசியல் வட்டாரத்தில் பெரும் எதிர்பார்ப்புக்கு மத்தியில் வெளியான அதிமுகவின் இரண்டாம் கட்ட வேட்பாளர் பட்டியலில், திருச்சி லால்குடி தொகுதி பலரது கவனத்தை ஈர்த்துள்ளது. அண்மையில்தான் ஐஜேகே (IJK) கட்சியிலிருந்து விலகி அதிமுகவில் இணைந்த லீமா ரோஸ், இணைந்த கையோடு வேட்பாளர் சீட்டையும் தட்டிச் சென்றுள்ளார்.

லாட்டரி அதிபர் மார்ட்டினின் மனைவியும், ஐஜேகே தலைவர் ஜோஸ் சார்லஸ் மார்ட்டினின் தாயாருமான இவர், அதிமுகவின் பலமான வேட்பாளராக லால்குடியில் களம் இறக்கப்பட்டுள்ளார். ​இந்த அறிவிப்பின் பின்னணியில் ஒரு சுவாரசியமான குடும்ப உறவும் ஒளிந்துள்ளது. தமிழக வெற்றிக் கழகத்தின் தேர்தல் மேலாண்மை பொதுச் செயலாளர் ஆதவ் அர்ஜுனா, இந்த லீமா ரோஸின் மகளின் கணவர் (மருமகன்) என்பது குறிப்பிடத்தக்கது.

ஒரு பக்கம் மருமகன் தவெக-வில் முக்கியப் பொறுப்பில் இருக்க, மறுபக்கம் மாமியார் அதிமுக வேட்பாளராகக் களம் காண்பது திருச்சி அரசியல் களத்தை இப்போதே சூடாக்கியுள்ளது. லாட்டரி குடும்பத்தின் செல்வாக்கும், அதிமுகவின் பலமும் சேர்ந்து லால்குடியில் என்ன மாற்றத்தை ஏற்படுத்தும் என்பதைப் பொறுத்திருந்துதான் பார்க்க வேண்டும்.