இந்து புராணங்களின்படி செல்வத்தின் அதிபதியாகவும், வட திசையின் காவலராகவும் போற்றப்படுபவர் குபேரன். பெரும் செல்வத்திற்கு அதிபதியான இவர், பிரம்மதேவரின் பேரனும் விஸ்ரவ முனிவரின் மகனுமாவார். சிவபெருமானின் தீவிர பக்தரான குபேரன், தனது கடுமையான தவத்தின் மூலம் பிரம்மதேவரிடமிருந்து இணையற்ற செல்வம், புஷ்பக விமானம் மற்றும் உலகிலேயே மிக அழகிய தங்க நகரமான இலங்கை மாநகரத்தையும் பரிசாகப் பெற்றார்.

ஆனால், பிற்காலத்தில் இலங்கையின் அரசராக அறியப்பட்ட இராவணனுக்கும், குபேரனுக்கும் இடையே இருந்த நெருங்கிய சொந்த பந்தமும், அவர்களுக்குள் எழுந்த அதிகாரப் போட்டியும் பலரும் அறியாத ஒரு வரலாற்றுப் பின்னணியாகும். விஸ்ரவ முனிவருக்கும் அவரது முதல் மனைவியான தேவவர்ணினிக்கும் பிறந்தவர் குபேரன். அதே விஸ்ரவ முனிவருக்கும் அவரது இரண்டாவது மனைவியான கைக்கசி என்பவருக்கும் பிறந்தவர்கள் இராவணன், கும்பகர்ணன் மற்றும் விபீஷணன் ஆகியோராவர்.

அந்த வகையில், குபேரன் இராவணனின் சொந்த தாய்வழி அல்லாத மூத்த சகோதரன்  ஆவார். குபேரன் இலங்கையைத் தலைநகராகக் கொண்டு அசுரர்கள் மற்றும் யக்ஷர்களின் ஆதரவோடு மிகவும் நேர்மையாகவும் வளமையாகவும் ஆட்சி செய்து வந்தார். ஆனால், இராவணன் பிரம்மதேவரிடம் கடுமையான தவம் இயற்றிப் பல அரிய வரங்களைப் பெற்ற பிறகு, தனது தாயான கைக்கசியின் தூண்டுதலினாலும், தனது பேராசையினாலும் இலங்கையின் மீது கண்வைத்தான்.  இலங்கை நகரம் உண்மையில் அசுரர்களுக்குச் சொந்தமானது என்றும், குபேரன் அதைவிட்டு வெளியேற வேண்டும் என்றும் இராவணன் உரிமை கோரினான்.

தன் தம்பியுடன் தேவையற்ற போரும் ரத்தச்சிந்தலும் வேண்டாம் என்று கருதிய தர்மவாதியான குபேரன், அமைதியை விரும்பி இலங்கையின் ஆட்சியை இராவணனிடம் ஒப்படைக்கச் சம்மதித்தார். இருப்பினும், இராவணனின் பேராசை அங்கு முடியவிலை. இலங்கையைக் கைப்பற்றியது மட்டுமன்றி, குபேரனுக்குச் சொந்தமான புகழ்பெற்ற ‘புஷ்பக விமானத்தையும்’ அவரிடமிருந்து பலவந்தமாகப் பறித்துக்கொண்டான்.

தன் அண்ணனை அரியணையிலிருந்து வீழ்த்தி நாடோடியாக்கிய இராவணன், இலங்கையின் பேரரசனாக முடிசூட்டிக்கொண்டான். இதன்பின்னர், குபேரன் வட திசை நோக்கிச் சென்று, இமயமலையின் கைலாய மலையருகே அமைந்துள்ள ‘அளகாபுரி’ என்னும் புதிய நகரத்தை உருவாக்கி, தனது செல்வத்தின் பேரரசை மீண்டும் நிறுவி ஆட்சி செய்யத் தொடங்கினார்.