கன்னியாகுமரி மக்களுக்கு சிங்கப்பூரின் பிரமாண்ட அழகு எப்போதும் கவர்ச்சிகரமானது. மெர்லியன், மெரினா பே சாண்ட்ஸ், கார்டன்ஸ் பை தி பே போன்ற இடங்களை சுற்றிப்பார்க்க பலர் ஆசைப்படுவது வழக்கம். இதற்காக நம்பகமான சுற்றுலா நிறுவனங்கள் மூலம் விசா பெற்று பயணிக்கலாம்.

ஆனால், தவறான நிறுவனங்களை நம்பி ஏமாறுவோரும் உண்டு. அப்படி, மாலத்தீவில் பணிபுரியும் கன்னியாகுமரியைச் சேர்ந்த பிரவின் ஜோ, தனது குடும்பத்துடன் சிங்கப்பூர், மலேசியா சுற்றுலா செல்ல ஆசைப்பட்டு, திருவனந்தபுரத்தைச் சேர்ந்த தனியார் டிராவல்ஸ் நிறுவனத்தில் ரூ.3.36 லட்சம் செலுத்தியுள்ளார். ஆனால், அவரது கனவு பயணம் நடக்காமல், பணமும் மோசடியில் பறிபோனது.

கன்னியாகுமரி மாவட்டம், திருவட்டார் அருகே காஞ்சான்காடு முகிலன்கரையைச் சேர்ந்த 40 வயது பிரவின் ஜோ, தனது மனைவி ஜாய்ஸ் இவிலின் (31) மற்றும் நான்கு உறவினர்களுடன் சுற்றுலா செல்ல திட்டமிட்டு, கடந்த நவம்பரில் திருவனந்தபுரம் வந்தார். முதல் தவணையாக ரூ.80,000, இரண்டாவது தவணையாக ரூ.2,66,400 என மொத்தம் ரூ.3,36,400 செலுத்தினார்.

ஆனால், டிராவல்ஸ் நிறுவனம் சரியான பதில் அளிக்காமல், பயண ஏற்பாடுகளை செய்யவில்லை, பணத்தையும் திருப்பித் தரவில்லை. இதனால் ஏமாற்றப்பட்டதை உணர்ந்த ஜாய்ஸ் இவிலின், திருவட்டார் காவல் நிலையத்தில் புகார் அளித்தார்.

அந்த புகாரின் அடிப்படையில், பெங்களூருவைச் சேர்ந்த டிராவல்ஸ் மேலாளர் அகஸ்டின் தாஸ் (47) களியக்காவிளையில் கைது செய்யப்பட்டு, பத்மநாபபுரம் நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டார். இந்த மோசடி வழக்கில் தொடர்புடைய மற்றொரு நபரை காவல்துறை தேடி வருகிறது.