இந்தியா-பாகிஸ்தான் இடையிலான அதிகரித்த பரபரப்பான சூழ்நிலையில், இந்திய ராணுவத்தின் தாக்கத்தையும், பாதுகாப்பையும் புகழ்ந்து ரஷ்ய பெண் ஒருவர் வெளியிட்ட வீடியோ சமூக வலைதளங்களில் பலரது மனதையும் வென்றுள்ளது.
‘ரஷ்ய பெண்’ என தன்னை அறிமுகப்படுத்திக் கொள்ளும் பொலினா அகர்வால் என்ற ரஷ்ய பெண், தற்போது ஹரியானாவின் குருக்ராமில் வசித்து வருகிறார். அவர் தனது இன்ஸ்டாகிராம் பக்கத்தில், “இந்திய ராணுவம் நம்மை பாதுகாக்கிறது என்பதால்தான் நாம் இரவு நிம்மதியாக உறங்க முடிகிறது. அதற்கு நன்றி” என உருக்கமாக பகிர்ந்துள்ளார்.
அந்த வீடியோவில், அவரது ரஷ்யப் பாட்டி இந்தியாவுக்குள் பதட்ட சூழ்நிலைகள் இருப்பதைக் கேட்டு, வீட்டுக்கு திரும்ப சொல்லியதாகவும், அதற்குப் பதிலளிக்கும்போது, “எனக்கு வீடு வேறேதுமில்லை… இந்தியாவே என் வீடு” என கூறியதாகவும் பொலினா தெரிவித்துள்ளார்.
View this post on Instagram
அதுபோல, இந்திய ராணுவத்தின் பாதுகாப்புச் செயல்திறனை புகழ்ந்த அவர், “இந்திய ராணுவம் பயன்படுத்தும் பலத்த ஆயுதங்கள் மற்றும் விமான பாதுகாப்பு பொருட்கள் பலவற்றையும் ரஷ்யா தான் வழங்கியுள்ளது. இந்த ட்ரோன்கள், விமானங்கள் போன்ற எதையும் எதிர்த்து இந்தியா நம்பிக்கையுடன் நிற்கிறது” என்றார்.
பின்னர் பேசிய பொலினா, “இந்திய வீரர்களிடம் நம்ப முடியாத அளவுக்கு தியாகமும், சமர்ப்பண உணர்வும் இருக்கிறது. அவர்கள் தங்கள் உயிரை தியாகம் செய்து நமக்கு நிம்மதியான வாழ்க்கையை உறுதி செய்கிறார்கள். நாம் தினமும் இருப்பது போல் இருப்பதற்கு அவர்களே காரணம்” என தெரிவித்தார்.
“இந்தியா என் நிம்மதியான வீடு என்பதைச் சொல்லும் அளவுக்கு ராணுவ வீரர்களுக்கு நான் கடமைப்பட்டுள்ளேன்” என உருக்கமுடன் கூறியுள்ளார். இந்த வீடியோ இதுவரை 1.49 லட்சம் பார்வைகள் மற்றும் 15,000-க்கும் அதிகமான லைக்ஸ்களை பெற்றுள்ளது.
இதற்கு இணையத்தில் பலர் மனமுவந்து எதிர்வினை தெரிவித்துள்ளனர். ஒருவர், “S-400, ஆகாஷ் போன்ற பாதுகாப்பு முறைமைகள் மற்றும் வீரர்களின் தியாகம் நம் மதிப்புக்குரியது” எனக் குறிப்பிட்டார். மற்றொருவர், “ஒரு ரஷ்யப் பெண் இந்திய வீரர்களை இவ்வளவு மனமுவந்து பாராட்டுவது மிக அற்புதமானது” என கூறினார்.
