ஆபாச வீடியோக்கள் மற்றும் ஆட்சேபனைக்குரிய விளம்பரங்களை ஒளிபரப்பியதாக குற்றம்சாட்டப்பட்ட 25 OTT தளங்கள் மற்றும் வலைத்தளங்களுக்கு மத்திய அரசு கடுமையான நடவடிக்கை எடுத்துள்ளது. இந்த பட்டியலில் ALTBalaji, ULLU, Big Shots App, Desiflix, Boomex, Navarasa Lite, Gulab App உள்ளிட்டவை அடங்குகின்றன.

இந்த தளங்கள் மீது நடவடிக்கை எடுக்கப்பட்டதற்கான காரணமாக, ஆபாச வீடியோக்கள், வெளிப்படையான விளம்பரங்கள் மற்றும் ஒழுக்கக் கோடுகளுக்கு முரணான உள்ளடக்கங்களை வழங்கியிருப்பது குறிப்பிடப்பட்டுள்ளது.

இந்த தடை நடவடிக்கையின் பின்புலமாக, OTT தளங்கள் மற்றும் சமூக வலைதளங்களில், பொது நல்லடக்கம் மற்றும் பெண்கள் பாதுகாப்புக்கு எதிரான உள்ளடக்கங்கள் அதிகரித்து வருவதை கண்டித்தும், சமுதாயம் மீது அதன் தாக்கத்தை கருத்தில் எடுத்தும் மத்திய அரசு நடவடிக்கை எடுத்துள்ளது. ஏற்கனவே ஏப்ரல் மாதம் உச்ச நீதிமன்றம், இந்த விவகாரத்தில் மத்திய அரசுக்கு நோட்டீஸ் அனுப்பி விளக்கம் கோரியது. Netflix, Amazon Prime, ALTBalaji, ULLU, YouTube, Facebook, Instagram உள்ளிட்ட பல்வேறு தளங்களுக்கும் நோட்டீஸ் அனுப்பப்பட்டது.

ULLU தளத்தில் கடந்த மாதம் வெளியான ‘House Arrest’ தொடர் ஆண்கள் மற்றும் பெண்கள் மீதான ஆபாசக் காட்சிகளை அதிகம் கொண்டதாக சமூக வலைதளங்களில் விமர்சனம் எழுந்தது. இந்த தொடரை தேசிய மகளிர் ஆணையம் (NCW) தன்னிச்சையாக எடுத்துக்கொண்டு, பெண்களை தவறாக சித்தரித்துள்ளதாக கண்டனம் தெரிவித்தது.

இதனையடுத்து NCW, மத்திய அரசை கடுமையாக வலியுறுத்தி நடவடிக்கை எடுக்க வேண்டும் என கூறியது. தற்போது மத்திய அரசு எடுத்துள்ள இந்த நடவடிக்கை, ஒழுங்குபடுத்தப்பட்ட டிஜிட்டல் சூழலை உருவாக்கும் பக்கம் நகரும் முக்கிய முயற்சியாக பார்க்கப்படுகிறது.