தமிழக அரசியலில் பெரும் புயலைக் கிளப்பியுள்ள தவெக எம்.எல்.ஏ குதிரை பேர விவகாரத்தில், திமுக முன்னாள் அமைச்சர் செந்தில் பாலாஜி தொடர்பாகச் சென்னை முதன்மை அமர்வு நீதிமன்றம் மிக முக்கியமான மற்றும் கெடுபிடியான உத்தரவைப் பிறப்பித்துள்ளது.

​கிருஷ்ணகிரி மாவட்டம் ஊத்தங்கரை தொகுதி தவெக எம்.எல்.ஏ இளையராஜா, சட்டப்பேரவையில் ஆளும் தவெக அரசுக்கு எதிராக வாக்களிக்கத் தனக்கு 35 கோடி ரூபாய் வரை லஞ்சம் தரப் பேரம் பேசப்பட்டதாகச் சென்னை காவல் ஆணையரிடம் புகார் அளித்திருந்தார். இந்தச் சம்பவத்தின் அடிப்படையில் திருவல்லிக்கேணி காவல்துறையினர் வழக்குப் பதிவு செய்து தீவிர விசாரணை மேற்கொண்டு வந்தனர்.

​இந்த வழக்கில் தனக்குக் கைது நடவடிக்கை பாயக்கூடும் என்பதால், முன்னாள் அமைச்சர் செந்தில் பாலாஜி சென்னை உயர் நீதிமன்றத்தில் முன்ஜாமீன் கோரி மனுத் தாக்கல் செய்திருந்தார். மனுவை விசாரித்த உயர் நீதிமன்றம் அவருக்கு நிபந்தனை முன்ஜாமீன் வழங்கியதை அடுத்து, அதன் உத்தரவாதத்தைச் சமர்ப்பிப்பதற்காகச் செந்தில் பாலாஜி சென்னை முதன்மை அமர்வு நீதிமன்றத்தில் நேரில் ஆஜராகிச் சரணடைந்தார்.

​மனுவை விசாரித்த முதன்மை அமர்வு நீதிமன்றம், செந்தில் பாலாஜியின் முன்ஜாமீன் உத்தரவாதத்தை ஏற்றுக்கொண்டது. அதேவேளையில், வழக்கு விசாரணைக்காகச் சில கடுமையான நிபந்தனைகளையும் நீதிமன்றம் விதித்துள்ளது. அதன்படி, 25,000 ரூபாய்க்கான சொந்த ஜாமீன் மற்றும் இரு நபர் உத்தரவாதத்தைச் செலுத்த உத்தரவிட்ட நீதிமன்றம், நாளை முதல் மறு உத்தரவு வரும் வரை தினமும் இரு வேளைகள் காவல் நிலையத்தில் ஆஜராக வேண்டும் என்று ஆணையிட்டுள்ளது.

​நீதிமன்ற உத்தரவின்படி, சென்னை திருவல்லிக்கேணி காவல் நிலையத்தில் தினமும் காலை 10:30 மணிக்கும் மற்றும் மாலை 5:30 மணிக்கும் நேரில் ஆஜராகி செந்தில் பாலாஜி கையொப்பமிட வேண்டும். ஊத்தங்கரை தவெக எம்.எல்.ஏ இளையராஜா கொடுத்த புகாரின் பேரில் தொடரப்பட்ட இந்த வழக்கில், முன்னாள் அமைச்சர் செந்தில் பாலாஜி தினமும் காவல் நிலையத்தில் ஆஜராகி கையெழுத்திட வேண்டிய சூழல் உருவாகியுள்ளது தமிழக அரசியல் வட்டாரத்தில் மீண்டும் பெரும் பரபரப்பை ஏற்படுத்தியுள்ளது.