தமிழக சட்டமன்றத் தேர்தல் 2026-ன் வாக்கு எண்ணிக்கை விறுவிறுப்பாக நடைபெற்று வரும் சூழலில், தலைநகர் சென்னையின் முக்கியத் தொகுதியான எழும்பூரில் தமிழக வெற்றிக் கழகம் (தவெக) தனது வெற்றியைப் பதிவு செய்துள்ளது.

எழும்பூர் தொகுதியில் தவெக சார்பில் போட்டியிட்ட ராஜ்மோகன், ஆரம்பம் முதலே முன்னிலை வகித்து வந்தார். திமுக மற்றும் அதிமுக ஆகிய இரு பெரும் கட்சிகளின் வேட்பாளர்களுக்குக் கடும் சவால் அளித்த அவர், இறுதிச் சுற்றுகளின் முடிவில் கணிசமான வாக்குகள் வித்தியாசத்தில் வெற்றி பெற்றுள்ளார். தொகுதி மக்களின் அடிப்படைப் பிரச்சினைகளுக்காகக் குரல் கொடுப்பேன் என்ற அவரது வாக்குறுதிக்கு மக்கள் அங்கீகாரம் அளித்துள்ளனர்.

எழும்பூர் மட்டுமல்லாது சென்னையின் பல்வேறு தொகுதிகளிலும் தமிழக வெற்றிக் கழகம் ஆதிக்கம் செலுத்தி வருகிறது: பெரம்பூர்: தவெக தலைவர் விஜய் சுமார் 44,000 வாக்குகள் வித்தியாசத்தில் வரலாற்றுச் சாதனை வெற்றியைப் பதிவு செய்துள்ளார். வில்லிவாக்கம்: தவெக வேட்பாளர் ஆதவ் அர்ஜுனா பெரும் வாக்கு வித்தியாசத்தில் வெற்றி பெற்றுள்ளார்.
திரு.வி.க. நகர் & சைதாப்பேட்டை: இங்கும் தவெக வேட்பாளர்கள் பல்லவி மற்றும் அருள் பிரகாசம் ஆகியோர் வெற்றி வாகை சூடியுள்ளனர்.

மதுரை மத்திய தொகுதியில் பி.டி.ஆர்-ஐ வீழ்த்தி தவெக முஸ்தபாவும், ராசிபுரம் தொகுதியில் அமைச்சர் மதிவேந்தனை வீழ்த்தி லோகேஷ் தமிழ்செல்வனும் வெற்றி பெற்றுள்ளது அரசியல் வட்டாரங்களில் பெரும் அதிர்ச்சியை ஏற்படுத்தியுள்ளது. அதே நேரத்தில், கேரளா மற்றும் மேற்கு வங்க மாநிலங்களிலும் ஆட்சி மாற்றம் ஏற்பட்டுள்ளது. கேரளாவில் காங்கிரஸும், மேற்கு வங்கத்தில் பாஜகவும் ஆட்சியைப் பிடித்துள்ளன.

ராஜ்மோகனின் வெற்றியைத் தொடர்ந்து எழும்பூர் தொகுதி முழுவதும் தவெக தொண்டர்கள் திரண்டு வந்து பட்டாசு வெடித்தும், இனிப்புகள் வழங்கியும் கொண்டாடி வருகின்றனர். “தமிழக அரசியலில் புதிய சகாப்தம் தொடங்கிவிட்டது” என அவர்கள் உற்சாகமாக முழக்கமிட்டு வருகின்றனர். மாநிலம் முழுவதும் 100-க்கும் மேற்பட்ட இடங்களில் தவெக முன்னிலை பெற்று வருவதால், அக்கட்சி ஆட்சியமைப்பதற்கான வாய்ப்புகள் அதிகரித்துள்ளன.