பாட்னாவின் தானாபூர் பகுதியில் அமைந்துள்ள ஒரு வினோதமான ‘ஏடிஎம்’ மையம் தற்போது சமூக வலைதளங்களில் பேசுபொருளாகியுள்ளது. வெளியிலிருந்து பார்ப்பதற்கு ஸ்டேட் பேங்க் ஆஃப் இந்தியா பெயர்ப்பலகை மற்றும் ஏடிஎம் மையத்திற்குரிய அனைத்து அடையாளங்களுடனும் காட்சியளிக்கும் இந்த இடத்திற்குள் சென்றால், மக்கள் பெரும் அதிர்ச்சிக்குள்ளாகின்றனர்.

ஏனெனில், அங்குப் பணத்தை வழங்கும் இயந்திரத்திற்குப் பதிலாக, வாடிக்கையாளர்களுக்கு முடி திருத்தம் செய்யும் சலூன் ஒன்று இயங்கி வருகிறது. வங்கி நிர்வாகம் இந்த ஏடிஎம் மையத்தை மூடிய பிறகு, அந்த இடத்தை வாடகைக்கு எடுத்த நபர் அதன் பழைய தோற்றத்தை மாற்றாமல் அப்படியே சலூனாக மாற்றிவிட்டதுதான் இந்த குழப்பத்திற்கு முக்கிய காரணமாகும்.

“>

மேலும் பணம் எடுப்பதற்காக அவசரமாக இந்த இடத்திற்கு வரும் வாடிக்கையாளர்கள், உள்ளே நுழைந்ததும் கத்தரிக்கோல் மற்றும் கண்ணாடிகளுடன் இருக்கும் சலூனைப் பார்த்து ஒரு நிமிடம் திகைத்துப் போகின்றனர். ஏடிஎம் மையத்தின் கண்ணாடி கதவுகள் மற்றும் ஏசி வசதி அப்படியே இருப்பதால், பலரும் ஏமாற்றமடைந்தாலும், இந்த வினோதமான மாற்றம் அப்பகுதி மக்களிடையே பெரும் சிரிப்பையும் ஆச்சரியத்தையும் ஏற்படுத்தியுள்ளது.

இந்நிலையில் வங்கியின் அடையாளத்தை நீக்காமல் வணிகம் நடப்பது ஒருபுறம் வேடிக்கையாக இருந்தாலும், வெளியூர் நபர்களுக்கு இது ஒரு புரியாத புதிராகவே நீடிக்கிறது. இந்த “சலூன் ஏடிஎம்” பற்றிய செய்திகள் தற்போது இணையத்தில் வைரலாகி வருகின்றன.