2036-ஆம் ஆண்டு நடைபெறவுள்ள ஒலிம்பிக் போட்டிகளில் இந்திய விளையாட்டு வீரர்கள் அதிக அளவிலான பதக்கங்களைக் கைப்பற்றி புதிய சாதனை படைக்கும் வகையில், வீரர்களைத் தயார்படுத்தும் பணிகளை உடனடியாகத் தொடங்க வேண்டும் என்று பிரதமர் நரேந்திர மோடி அவர்கள் அதிகாரிகளுக்குத் தீவிரமாக அறிவுறுத்தியுள்ளார்.

​கேலோ இந்தியா சார்பில் அமைக்கப்பட்ட சிறப்பு நிகழ்ச்சியில் கலந்துகொண்டு காணொலி வாயிலாகப் பேசிய பிரதமர் மோடி, சர்வதேச விளையாட்டு அரங்கில் இந்தியாவின் முத்திரையைப் பதிக்க வேண்டுமானால் ஆரம்பக் கட்டத்திலேயே திறமையாளர்களைக் கண்டறிவது மிக அவசியம் என்று சுட்டிக்காட்டினார். இதற்காகத் நாடு முழுவதும் 5 முதல் 15 வயதுக்குட்பட்ட சிறுவர் மற்றும் சிறுமிகளிடம் உள்ள விளையாட்டுத் திறமையைக் கண்டறியும் பிரம்மாண்ட தேடுதல் வேட்டையை உடனடியாகத் தொடங்குமாறு கேட்டுக்கொண்டார்.

​தொடர்ந்து பேசிய அவர், ஒலிம்பிக் போன்ற உலகளாவிய தொடர்களில் இந்தியாவின் பதக்கப் பட்டியலை உயர்த்த வேண்டும் என்றால், நாம் குறிப்பிட்ட சில விளையாட்டுகளுடன் நின்றுவிடாமல் பல்வேறு வகையான விளையாட்டுப் பிரிவுகளிலும் சிறந்து விளங்க வேண்டும் என்று பரிந்துரைத்தார். இதுவரை இந்தியா பங்கேற்காத அல்லது தகுதி பெறாத போட்டிகளிலும் நமது வீரர்கள் தடம் பதிக்க வேண்டும் என்பதே முதன்மை நோக்கம் என்றும் குறிப்பிட்டார்.

​இளம் வயதிலேயே அடையாளம் காணப்படும் சிறுவர்களுக்கு அதிநவீனச் அறிவியல் பூர்வமான பயிற்சிகளும், சிறந்த உட்கட்டமைப்பு வசதிகளும் வழங்கப்படும் என்று தெரிவித்த பிரதமர் மோடியின் இந்த அதிரடி பேச்சு, நாட்டின் விளையாட்டு வீரர்கள் மற்றும் விளையாட்டு ஆர்வலர்கள் மத்தியில் மிகப்பெரிய எழுச்சியையும் வரவேற்பையும் ஏற்படுத்தியுள்ளது.