வீட்டில் வெங்காயம் அல்லது முள்ளங்கி பராத்தா செய்யும்போது, பூரணம் வெளியே வந்து பராத்தா உடைவது பலருக்கும் ஏற்படும் பிரச்சினை. குறிப்பாக உருட்டும்போது மாவில் ஒட்டிக்கொள்வது, நடுவில் கிழிவது போன்ற காரணங்களால் பராத்தா கச்சிதமாக வராமல் போகலாம். இதற்கு முக்கிய காரணங்களில் ஒன்று பூரணத்தில் இருக்கும் அதிகப்படியான நீர்ச்சத்து என்று சமையல் நிபுணர் பங்கஜ் பதூரியா தெரிவித்துள்ளார்.

வெங்காயப் பூரணத்தைத் தயாரிக்கும் முன்பு நறுக்கிய வெங்காயத்தில் சிறிதளவு உப்பு சேர்த்து சிறிது நேரம் வைத்திருக்க வேண்டும். இதனால் வெங்காயத்தில் இருக்கும் நீர் வெளியே வரும். பின்னர் அந்த நீரை முழுமையாகப் பிழிந்து எடுத்துவிட்டு, உலர்ந்த வெங்காயத்தைப் பூரணமாகப் பயன்படுத்த வேண்டும். இதுவே பராத்தா உருட்டும்போது கிழிவதையும் ஒட்டுவதையும் குறைக்க உதவும் என்று அவர் பகிர்ந்துள்ளார்.

இதே முறையை முள்ளங்கி பராத்தாவுக்கும் பயன்படுத்தலாம். முள்ளங்கியில் இயற்கையாகவே அதிக நீர்ச்சத்து இருப்பதால், அதைப் பூரணமாகப் பயன்படுத்துவதற்கு முன்பு அதிகப்படியான நீரைப் பிழிந்து அகற்றுவது முக்கியம். நீர் குறைந்த பூரணத்தை மாவுக்குள் வைத்து நன்றாக மூடி உருட்டினால் பராத்தா எளிதாகத் தயாராகும்.

எனவே, வெங்காயம் அல்லது முள்ளங்கி பராத்தா செய்யும்போது மாவை மட்டும் சரியாகத் தயாரிப்பது போதாது; பூரணத்தில் இருக்கும் அதிகப்படியான நீரையும் கட்டுப்படுத்துவது முக்கியம். அடுத்த முறை பராத்தா செய்யும்போது இந்த எளிய முறையைப் பின்பற்றி பாருங்கள். பூரணம் வெளியே வராமல், சீராக உருட்டி சமைக்க இது உதவும்.