ரயிலில் பயணம் செய்யும்போது திடீரென ஏசி வேலை செய்யாமல் போவதற்கோ அல்லது காற்று வருவதை நிறுத்துவதற்கோ ரயில்வே துறையின் பராமரிப்புக் குறைபாடுதான் காரணம் என்று நீங்கள் நினைத்திருக்கலாம். ஆனால், சமூக வலைதளங்களில் வைரலாகி வரும் ஒரு வீடியோவால் ஏசியின் உண்மையான நிலை வெளிச்சத்திற்கு வந்துள்ளதுடன், அதைப் பார்த்த அனைவரையும் அதிர்ச்சியில் ஆழ்த்தியுள்ளது. ரயிலின் ஏசி வென்ட்டிற்குள் இருந்து தின்பண்டங்களின் கவர்கள் மற்றும் பிளாஸ்டிக் குப்பைகள் மலைபோல் குவிந்து கிடப்பதைக் காட்டும் இந்த வீடியோ இணையத்தில் பெரும் விவாதத்தை ஏற்படுத்தியுள்ளது.

எக்ஸ் (X) தளத்தில் சுபஜித் தாஸ் என்ற பயனர் பகிர்ந்துள்ள இந்த வீடியோ  தீயாய் பரவி வருகிறது. அந்த வீடியோவில், ரயில்வே ஊழியர் ஒருவர் ஸ்க்ரூ டிரைவர் உதவியுடன் ரயிலின் ஏசி வென்ட் கிரில்லைத் திறப்பது பதிவாகியுள்ளது.

ஏசியின் கிரில் திறக்கப்பட்டவுடன் உள்ளே இருந்த காட்சிகள் காண்போரை உறைந்துபோகச் செய்தன. ஏசி வென்ட்டிற்குள் காற்று செல்வதற்கான இடமே இல்லாத அளவுக்கு குப்பைகள் முழுமையாக நிரப்பப்பட்டிருந்தன. அந்த குறுகிய இடத்தில் சிப்ஸ் பாக்கெட்டுகள், பயன்படுத்தப்பட்ட டீ பேப்பர் கப்கள் மற்றும் பிளாஸ்டிக் குப்பைகள் ஆகியவை பிடித்துத் திணிக்கப்பட்டிருந்தது தெரியவந்தது. உடனே அந்த ஊழியர் ஒரு துணியின் உதவியால் அந்த மொத்தக் குப்பைகளையும் வெளியே அள்ளிக் கொட்டினார்.

ரயில்களில் குப்பைத்தொட்டிகள் வைக்கப்பட்டிருந்தாலும், சில பயணிகள் சோம்பேறித்தனத்தால் தங்களது குப்பைகளைப் போன்ற மறைவான இடங்களில் தள்ளிவிட்டு விடுகிறார்கள். ரயிலில் ஏசி பழுதாகிவிட்டாலோ அல்லது குளிர் குறைவாக இருந்தாலோ பயணிகள்  புகார் செய்கிறார்களே தவிர, தங்களின் இந்த பொறுப்பற்ற செயலால் தான் இயந்திரங்கள் பாழாகின்றன என்பதை யோசிப்பதில்லை.

இந்த வீடியோ வெளியானதைத் தொடர்ந்து, கமெண்ட் பகுதியில் பயனர்கள் தங்களது பயங்கரமான அனுபவங்களைப் பகிர்ந்து வருகின்றனர். பல பயணிகள் தங்களது இருக்கைகளுக்கு அடியிலோ அல்லது கதவுகளுக்குப் பின்னால் குப்பைகளை மறைத்து வைப்பதை நேரில் பார்த்ததாகக் கூறியுள்ளனர். இந்த அசிங்கமான நிலைக்கு யார் பொறுப்பு? இதற்குப் பயணிகள் மட்டுமே காரணமா அல்லது ரயில்வே இன்னும் கடுமையான நடவடிக்கைகளை எடுக்க வேண்டுமா என்று மக்கள் விவாதித்து வருகின்றனர்.

ரயில்களில் ஒவ்வொரு இருக்கைக்கு அருகேயும் அல்லது எளிதில் எட்டும் தூரத்திலும் குப்பைத்தொட்டிகள் வைக்கப்பட வேண்டும் என்று பல பயனர்கள் பரிந்துரைத்துள்ளனர். அப்பொழுதுதான் மக்கள் இதுபோன்ற செயல்களில் ஈடுபட மாட்டார்கள் என்று கருதுகின்றனர். மேலும், ரயில்களில் சிசிடிவி கேமராக்கள் மூலம் தீவிரக் கண்காணிப்பு செய்யப்பட்டு, கடுமையான அபராதம் வசூலிக்கப்பட்டால் ஒழிய மக்களின் இந்த மோசமான பழக்கவழக்கங்கள் மாறாது என்றும் பலர் கருத்து தெரிவித்து வருகின்றனர்.