மயிலாடுதுறை மாவட்டம் சீர்காழியில் உள்ள ரயில்வே கேட் பகுதி ஒன்றில், ரயில் வருவதற்காகப் பாதுகாப்பு இரும்புத் தடுப்புகள் போடப்பட்டிருந்தன. அந்தச் சமயத்தில், அதிவேகமாக வந்துகொண்டிருந்த ரயிலின் முன்பாகப் பாய்ந்து தற்கொலை செய்துகொள்ளும் நோக்கில் நபர் ஒருவர் திடீரென ஓடிவந்து தண்டவாளத்தின் நடுவே அமர்ந்தார். ரயில் மிக அருகில் நெருங்கி வந்துகொண்டிருந்ததால் அங்கிருந்தவர்கள் அனைவரும் செய்வதறியாது திகைத்தனர். அப்போது அங்கு பணியில் இருந்த ரயில்வே கேட் கீப்பர்  சதீஷ்குமார், அந்த ஆபத்தான சூழ்நிலையைக் கண்டும் சற்றும் தயங்காமல், தனது சொந்த உயிரையும் பொருட்படுத்தாமல் மின்னல் வேகத்தில் தண்டவாளத்தை நோக்கிப் பாய்ந்தார்.

ஓடும் ரயிலின் இன்ஜினுக்கு மிக அருகில் நின்றுகொண்டிருந்த அந்த நபரை, கேட் கீப்பர் சதீஷ்குமார் தனது முழு பலத்தையும் திரட்டி சற்றும் யோசிக்காமல் தண்டவாளத்திற்கு வெளியே இழுத்துப் தள்ளிப் போட்டார். அடுத்த சில நொடிகளில் அந்த ரயில் அந்த இடத்தை மிக வேகமாகக் கடந்து சென்றது. கண்ணிமைக்கும் நேரத்தில், மிகச் சாதுரியமாகவும் துணிச்சலாகவும் செயல்பட்டு ஒரு மனித உயிரைக் காப்பாற்றிய அந்த ரயில்வே கேட் கீப்பர் சதீஷ்குமாரின் செயலை அங்கிருந்த பொதுமக்கள் அனைவரும் நெகிழ்ச்சியுடன் பாராட்டி வருகின்றனர். இச்சம்பவம் தொடர்பான சிசிடிவி காட்சிகள் தற்போது சமூக வலைத்தளங்களில் வெளியாகி, பார்ப்பவர்களின் நெஞ்சங்களை உலுக்கி வருவதோடு, இணையவாசிகளிடையே வைரலாகப் பரவி வருகிறது.