ஜிம்பாப்வேக்கு எதிரான டி20 தொடருக்கான இந்திய அணியில், நட்சத்திர விக்கெட் கீப்பர்-பேட்ஸ்மேனான சஞ்சு சாம்சன் சேர்க்கப்படாதது கிரிக்கெட் வட்டாரத்தில் பெரும் அதிர்ச்சியை ஏற்படுத்தியுள்ளது. ரசிகர்களைத் தாண்டி, இந்தியாவின் முன்னாள் வீரரான அஜின்கியா ரஹானேவும் இந்த முடிவுக்கு எதிராகத் தனது இன்ஸ்டாகிராம் பக்கத்தில் பகிரங்கமாக அதிருப்தியை வெளிப்படுத்தியுள்ளார். இதுகுறித்து அவர் வெளியிட்டுள்ள பதிவில், “தேர்வுக் குழுவினர் சஞ்சு சாம்சனுடன் இதுபற்றிப் பேசியிருப்பார்கள் என்று நம்புகிறேன்.

சமீபத்தில் நடந்து முடிந்த டி20 உலகக் கோப்பையில் இந்தியாவின் வெற்றிக்கு முக்கியப் பங்காற்றிய ஒரு வீரரை, திடீரென ஜிம்பாப்வே தொடரிலிருந்து ஒட்டுமொத்தமாகத் தூக்கி எறிந்தது எனக்கு மிகவும் விசித்திரமாகத் தெரிகிறது. அவர் விரைவில் பலத்த மீள்வருகை தருவார் என்று நம்புகிறேன்” எனத் தேர்வுக் குழுவின் முடிவை மறைமுகமாகக் கேள்வி எழுப்பியுள்ளார். ரஹானேவின் இந்த பதிவு சமூக வலைத்தளங்களில் காட்டுத்தீயாய் பரவி வருகிறது.

சமீபத்தில் நடந்த டி20 உலகக் கோப்பையில் சஞ்சு சாம்சன் மிகச்சிறப்பாக விளையாடி ‘தொடர் நாயகன்’ விருதைத் தட்டிச் சென்றிருந்தார். இருப்பினும், அதன் பிறகு அயர்லாந்து மற்றும் இங்கிலாந்துக்கு எதிரான போட்டிகளில் அவர் முறையே 5, 0, 1 ரன்கள் மட்டுமே எடுத்து ஃபார்ம் அவுட் ஆனதால், முதலில் ஆடும் லெவனிலிருந்தும், தற்போது ஜிம்பாப்வே தொடரிலிருந்தும் நீக்கப்பட்டுள்ளார். அவருக்குப் பதிலாக 15 வயதான இளம் வீரர் வைபவ் சூர்யவன்ஷிக்கு அணியில் வாய்ப்பு அளிக்கப்பட்டுள்ளது.

ஆனால், பிசிசிஐ வட்டாரங்களின்படி, வரும் செப்டம்பர் மாதம் நடைபெறவிருக்கும் ஆசிய விளையாட்டுப் போட்டிகளுக்கான தயாரிப்பைக் கருத்தில் கொண்டே சஞ்சு சாம்சனுக்கு ஓய்வு அளிக்கப்பட்டுள்ளது என்று கூறப்படுகிறது. ஸ்ரேயாஸ் ஐயரின் தலைமையிலான இந்திய அணி ஜூலை 23, 25 மற்றும் 27 ஆகிய தேதிகளில் ஹராரேவில் ஜிம்பாப்வேக்கு எதிராக மூன்று டி20 போட்டிகளில் விளையாடவுள்ள நிலையில், சஞ்சு சாம்சன் இல்லாதது சமூக வலைத்தளங்களில் விவாதப் பொருளாக மாறியுள்ளது.