ராஜஸ்தான் மாநிலம் பில்வாரா மாவட்டம் கரேடா நகரில் உள்ள ‘மாதேஸ்வரி மொபைல் ஷாப்’ என்ற கடையில், யாருமே எதிர்பாராத வகையில் ஒரு அதிரடி மற்றும் வினோதமான கொள்ளைச் சம்பவம் அரங்கேறியுள்ளது. நள்ளிரவில் நைசாகக் கடையின் மேற்கூரை வழியாக உள்ளே நுழைந்த ஒரு மர்ம ஆசாமி, கடையில் இருந்த சுமார் 35 முதல் 40 வரையிலான விலையுயர்ந்த ஸ்மார்ட்போன்களைத் திருடிக் கொண்டு தப்பியோடியுள்ளார். திருடப்பட்ட இந்த மொபைல் போன்களின் மதிப்பு மட்டும் பல லட்ச ரூபாய் இருக்கும் எனக் கூறப்படுகிறது. மறுநாள் காலையில் கடையைத் திறக்க வந்த உரிமையாளர், போன்கள் அனைத்தும் கொள்ளையடிக்கப்பட்டதைக் கண்டு அதிர்ச்சியடைந்து உடனடியாகப் போலீசாருக்குத் தகவல் கொடுத்துள்ளார்.
இந்தச் சாதாரணக் கொள்ளைச் சம்பவத்தை ஒட்டுமொத்த இணையத்திலும் வைரலாக்கியது அந்தத் திருடனின் விசித்திரமான ஐடியா தான். அந்த நபர் திருட வரும்போது தன் முகம் தெரியாமல் இருக்க, பிரதமர் நரேந்திர மோடியின் முக சாயல் கொண்ட முகமூடியை அணிந்து கொண்டு திருடியுள்ளார். இந்த அதிர்ச்சி காட்சிகள் அங்கிருந்த சிசிடிவி (CCTV) கேமராவில் அப்படியே பதிவாகி தற்போது சமூக வலைதளங்களில் காட்டுத்தீயாய் பரவி வருகிறது. இந்த வினோதமான கொள்ளைச் சம்பவம் குறித்து வழக்குப் பதிவு செய்துள்ள போலீசார், சிசிடிவி காட்சிகளை தீவிரமாக ஆய்வு செய்து அந்தப் பலே திருடனை வலைவீசித் தேடி வருகின்றனர். இணையத்தில் இந்த விவகாரம் பெரும் பேசுபொருளாகி மீம்ஸ்கள் பறக்க ஆரம்பித்துள்ளன.
