திண்டுக்கல் மாவட்டத்தில் பொதுமக்களுக்குப் பெரும் இடையூறாகச் செயல்பட்டு வரும் மதுபானக் கடையை உடனடியாக மூடக்கோரி தொடரப்பட்ட வழக்கில், சென்னை உயர்நீதிமன்ற மதுரை அமர்வு நீதிபதிகள் அதிரடியான உத்தரவைப் பிறப்பித்துள்ளனர். கோவில், மருத்துவமனை மற்றும் கல்வி நிறுவனங்களுக்கு நடுவே, பொதுமக்களுக்கும் மாணவர்களுக்கும் அச்சுறுத்தலாக இருக்கும் இந்த மதுபானக் கடையை ஏன் இன்னும் அகற்றவில்லை என்று அதிகாரிகள் தரப்பைக் காரசாரமாகக் கேள்வி எழுப்பியுள்ளனர். மேலும், “ஒன்று அந்தக் கடையை உடனடியாக மூடுங்கள் அல்லது வேறு இடத்திற்கு மாற்றுங்கள்” என்று நீதிபதிகள் தங்களின் உத்தரவில் திட்டவட்டமாகத் தெரிவித்துள்ளனர்.
இந்த விவகாரம் தொடர்பாக திண்டுக்கல் மாவட்ட ஆட்சியர், கலால் மற்றும் மதுவிலக்கு ஆணையாளர் ஆகியோர் தரப்பில் இதுவரை என்னென்ன நடவடிக்கைகள் எடுக்கப்பட்டுள்ளன என்பது குறித்து விரிவான அறிக்கை தாக்கல் செய்ய வேண்டும் என்றும் நீதிபதிகள் உத்தரவிட்டுள்ளனர். பொதுமக்களின் நீண்ட நாள் கோரிக்கைக்கு ஆதரவாக நீதிமன்றம் இந்த அதிரடி சாட்டையடியை நிகழ்த்தியுள்ளதால், திண்டுக்கல் மாவட்ட அரசு அதிகாரிகள் வட்டாரத்தில் தற்போது பெரும் பரபரப்பு தொற்றிக்கொண்டுள்ளது.
