மேற்கு ஆசியாவில் போர் பதற்றம் நீடித்து வரும் நிலையில், ஈரானின் புதிய உச்ச தலைவர் மொஜ்தபா கமேனி குறித்த செய்திகள் உலக நாடுகளின் கவனத்தை ஈர்த்துள்ளன. முந்தைய தாக்குதலில் தந்தை அயதுல்லா அலி கமேனி கொல்லப்பட்ட பிறகு, மொஜ்தபா தலைமைப் பொறுப்பை ஏற்றாலும் அவர் பொதுவெளியில் தோன்றாமல் ரகசியமாகச் செயல்பட்டு வருகிறார்.
அவர் அந்தத் தாக்குதலில் படுகாயமடைந்ததாகவும், தற்போது பாதுகாப்பான இடத்திலிருந்து மனிதச் சங்கிலி மற்றும் கடிதங்கள் வழியாக மட்டுமே உத்தரவுகளைப் பிறப்பிப்பதாகவும் அமெரிக்க உளவு அமைப்புகள் தெரிவிக்கின்றன.
மின்னணுத் தொடர்புகளைத் தவிர்த்து வரும் அவர், திரைக்குப் பின்னால் இருந்து கொண்டே அமெரிக்காவுடனான பேச்சுவார்த்தை மற்றும் போர் உத்திகளை வகுப்பதில் முக்கியப் பங்கு வகிக்கிறார்.
இருப்பினும், மொஜ்தபா நலமாக இருப்பதாகவும், வதந்திகளை நம்ப வேண்டாம் என்றும் ஈரான் அரசு விளக்கமளித்துள்ளது. அவருக்குச் சில காயங்கள் ஏற்பட்டதை ஒப்புக்கொண்டாலும், அவர் விரைவாகக் குணமடைந்து வருவதாகவும், சரியான நேரத்தில் மக்கள் முன் தோன்றுவார் என்றும் தெஹ்ரான் தெரிவித்துள்ளது.
தற்போது ஈரானில் கடும் அரசியல் அதிகாரப் போட்டி நிலவினாலும், எந்தவொரு நீண்டகால முற்றுகையையும் தாங்கும் வலிமை அந்நாட்டிற்கு இருப்பதாக அமெரிக்கா மதிப்பிடுகிறது. மர்மமும் மௌனமும் சூழ்ந்துள்ள மொஜ்தபாவின் இந்த ரகசிய நிர்வாக முறை, ஈரான் அரசியலில் புதிய விவாதங்களை உருவாக்கியுள்ளது.
