நெல்லை மாவட்டம் களக்காடு மற்றும் அதன் சுற்றுவட்டாரப் பகுதிகளில் காட்டுப்பன்றி, கடமான், கரடி என வனவிலங்குகளின் அட்டகாசம் எல்லை மீறிப் போயுள்ளதால் விவசாயிகள் வாழ்வாதாரத்தை இழந்து தவித்து வருகின்றனர்.
விளை நிலங்களுக்குள் புகுந்து பயிர்களைச் சேதப்படுத்தும் காட்டுப் பன்றிகளைச் சுட்டுக் கொல்லத் தமிழக அரசு அனுமதி அளித்தும், வனத்துறையினர் இதில் காட்டும் மெத்தனப் போக்கு விவசாயிகளை கடும் ஆத்திரத்தில் ஆழ்த்தியுள்ளது.
“விலங்குகள் பயிர்களை நாசம் செய்கின்றன, ஆனால் அரசு ஒரு பைசா கூட இழப்பீடு தருவதில்லை” என வேதனையோடு கூறும் விவசாயிகள், வனத்துறையின் சுணக்கத்தால் தங்களின் உழைப்பு வீணாவதாகக் குற்றம் சாட்டுகின்றனர்.
இந்தத் தொடர் புறக்கணிப்புக்கு எதிர்ப்புத் தெரிவிக்கும் வகையில், களக்காடு விவசாயிகள் பாதுகாப்பு குழு ஒரு அதிரடி முடிவை எடுத்துள்ளது. வரவிருக்கும் சட்டமன்றத் தேர்தலை முற்றிலுமாகப் புறக்கணிக்கப் போவதாக அக்குழுவின் தலைவர் தாவீது அறிவித்துள்ளார்.
இதனையொட்டி அந்தப் பகுதி முழுவதும் “தேர்தல் புறக்கணிப்பு” தொடர்பான சுவரொட்டிகள் ஒட்டப்பட்டு வருவது தேர்தல் களத்தில் பெரும் பரபரப்பை ஏற்படுத்தியுள்ளது. “எங்கள் கோரிக்கைக்குச் செவிசாய்க்காத அரசுக்கு எதற்கு ஓட்டு?” என விவசாயிகள் எழுப்பியுள்ள கேள்வி, அரசியல் கட்சியினரை அதிர்ச்சியில் ஆழ்த்தியுள்ளது.
