ஈரான் – அமெரிக்கா போர் சூழலால் எழுந்துள்ள வணிக சிலிண்டர் தட்டுப்பாட்டுக்கு உடனடியாகத் தீர்வு காண வேண்டும் என்று எதிர்க்கட்சித் தலைவர் எடப்பாடி பழனிசாமி மத்திய அரசுக்குக் கோரிக்கை விடுத்துள்ளார். போதிய கையிருப்பு மற்றும் விநியோகத்தை உறுதி செய்து, உணவகங்கள் மற்றும் விடுதிகளுக்குத் தடையின்றி சிலிண்டர்கள் கிடைப்பதை மத்திய அரசு ஆவண செய்ய வேண்டும் என்று அவர் வலியுறுத்தியுள்ளார். இந்த இக்கட்டான நேரத்தில் மக்களின் அத்தியாவசியத் தேவைகள் பாதிக்கப்படாமல் இருப்பதை உறுதி செய்வது அரசின் கடமை என அவர் சுட்டிக்காட்டியுள்ளார்.
அதேவேளையில், இந்த விவகாரத்தில் மாநில அரசு செயல்படும் விதம் குறித்தும் இபிஎஸ் கடும் விமர்சனங்களை முன்வைத்துள்ளார். சிலிண்டர் தட்டுப்பாடு என்ற பெயரில் மக்களிடையே தேவையற்ற அச்ச உணர்வை ஏற்படுத்தும் வேலைகளைத் திமுக அரசு கைவிட வேண்டும் என்று அவர் கூறியுள்ளார். ஹோட்டல்கள் மற்றும் விடுதிகள் தடையின்றி இயங்குவதற்குத் தேவையான ஆக்கப்பூர்வமான நடவடிக்கைகளை மாநில அரசு போர்க்கால அடிப்படையில் எடுக்க வேண்டும் என்றும் அவர் தனது பதிவில் குறிப்பிட்டுள்ளார்.
