2026 டி20 உலகக் கோப்பையின் மிக முக்கியமான சூப்பர்-8 ஆட்டத்தில் இன்று இந்தியாவும் தென்னாப்பிரிக்காவும் மோதவுள்ளன. இந்தப் போட்டி நடைபெறும் அகமதாபாத் மைதானம் குறித்துப் பேசிய தென்னாப்பிரிக்க பேட்டிங் பயிற்சியாளர் ஆஷ்வெல் பிரின்ஸ், இந்த மைதானம் இந்தியாவை விடத் தங்களுக்கே அதிகச் சாதகமாக இருக்கும் எனத் தன்னம்பிக்கையுடன் தெரிவித்துள்ளார்.

நடப்புத் தொடரின் லீக் சுற்றில் தென்னாப்பிரிக்க அணி தான் விளையாடிய நான்கு போட்டிகளில் மூன்றினை இதே அகமதாபாத் மைதானத்தில் விளையாடி வெற்றி பெற்றுள்ளது. இதனால் இங்கிருக்கும் ஆடுகளத்தின் தன்மை மற்றும் சூழல் குறித்துத் தங்கள் அணி வீரர்களுக்கு மிகத் தெளிவான புரிதல் இருப்பதாக அவர் சுட்டிக்காட்டினார்.

“தொடர்ச்சியாக இங்கு விளையாடியதன் மூலம் எங்களுக்கு இந்த மைதானம் ஒரு பரிச்சயமான இடமாக மாறிவிட்டது; இது இந்தியாவை விட எங்களுக்குக் கூடுதல் சாதகத்தைத் தரும்” என்று அவர் கூறியுள்ளார். மேலும், இந்திய அணியில் அபிஷேக் சர்மா, இஷான் கிஷன் போன்ற பலமான வீரர்கள் இருந்தாலும், குறிப்பிட்ட தனிநபர்களை விட ஒட்டுமொத்த இந்திய அணியின் மீதும் அழுத்தம் கொடுத்து விக்கெட்டுகளை வீழ்த்துவதே தங்கள் திட்டம் என அவர் விளக்கினார்.

லீக் சுற்றில் பலவீனமான அணிகளை எதிர்கொண்ட இந்தியாவிற்கு, அகமதாபாத் ஆடுகளம் ஒரு கடுமையான சோதனையாக இருக்கும் என்றும் தென்னாப்பிரிக்கத் தரப்பு எச்சரித்துள்ளது.