தமிழகத்தில் 2026 சட்டமன்றத் தேர்தலை முன்னிட்டு கூட்டணிக் கணக்குகள் இப்போதே சூடுபிடிக்கத் தொடங்கிவிட்டன. குறிப்பாக, திமுக கூட்டணியில் பாமக இணைந்தால், தாங்கள் அந்தக் கூட்டணியிலிருந்து வெளியேறுவது உறுதி என விடுதலைச் சிறுத்தைகள் கட்சித் தலைவர் திருமாவளவன் நேற்று அதிரடியாகத் தெரிவித்தார். சமூக நீதி மற்றும் கொள்கை ரீதியாக மாறுபட்ட துருவங்களாக இருக்கும் பாமகவும் விசிகவும் ஒரே கூட்டணியில் இருப்பது சாத்தியமில்லை என்பதை அவர் தனது பேச்சின் மூலம் மீண்டும் உறுதிப்படுத்தியுள்ளார்.

இது திமுக தலைமைக்குப் பெரும் தலைவலியை ஏற்படுத்தியுள்ள நிலையில், திருமாவளவனின் இந்த ‘அல்டிமேட்டம்’ அரசியல் வட்டாரத்தில் பெரும் பரபரப்பை ஏற்படுத்தியுள்ளது. ​இந்நிலையில், பாமக தரப்பிலிருந்தும் ஒரு முக்கிய தகவல் வெளியாகியுள்ளது. திமுக-வுடன் கூட்டணி வைப்பது தொடர்பாக யாரும் பொதுவெளியில் பேச வேண்டாம் என்றும், அந்தக் கூட்டணி நமக்குத் தேவையில்லை என்றும் ராமதாஸ் தனது ஆதரவாளர்களுக்கு ரகசியமாக அறிவுறுத்தியுள்ளதாகக் கூறப்படுகிறது.

ஏற்கனவே அன்புமணி ராமதாஸ் தரப்பு அதிமுக கூட்டணியில் இருப்பதால், இரண்டு பக்கமும் காய் நகர்த்தும் பாமக, ஒருவேளை சரியான வாய்ப்பு அமையாவிட்டால் தனித்துப் போட்டியிடுவது குறித்தும் ஆலோசித்து வருகிறாராம் ராமதாஸ். விசிக-வின் பிடிவாதம் ஒருபுறம், ராமதாஸின் மௌனம் மறுபுறம் என திமுக கூட்டணிக்குள் நடக்கும் இந்த விவகாரங்கள் தமிழக அரசியலில் பெரிய மாற்றத்தை ஏற்படுத்தும் என எதிர்பார்க்கப்படுகிறது.