திருப்பரங்குன்றம் மலை மேல் தீபம் ஏற்றுவது தொடர்பான மதுரை உயர்நீதிமன்ற கிளையின் தீர்ப்பு, இந்திய அரசியலமைப்புச் சட்டத்திற்கு எதிரானது என்று விடுதலைச் சிறுத்தைகள் கட்சித் தலைவர் திருமாவளவன் விமர்சித்துள்ளார். இந்தத் தீர்ப்பு தமிழகத்தின் நீண்டகால மதநல்லிணக்கச் சூழலைச் சீர்குலைக்க வழிவகுக்கும் என்றும், நீதித்துறையின் மீதான மக்களின் நம்பிக்கையைத் தகர்க்கும் வகையில் அமைந்துள்ளதாகவும் அவர் தனது கவலையை வெளிப்படுத்தியுள்ளார்.
மாநிலத்தின் அமைதியையும், சமூக நல்லிணக்கத்தையும் பாதுகாக்க வேண்டியது அரசின் கடமை என்று அவர் வலியுறுத்தியுள்ளார். எனவே, இந்தத் தீர்ப்பை எதிர்த்து தமிழக அரசு உடனடியாக உச்ச நீதிமன்றத்தில் மேல்முறையீடு செய்ய வேண்டும் என்றும், பொதுமக்களிடையே நிலவும் அமைதியற்ற சூழலைத் தவிர்க்க நடவடிக்கை எடுக்க வேண்டும் என்றும் அவர் வேண்டுகோள் விடுத்துள்ளார்.
