சமூக வலைதளங்களில் சமீபத்தில் ஒரு வீடியோ காட்டுத்தீயாகப் பரவியது. அதில் ஒரு டிரைவர் தனது முதலாளிக்கு போன் செய்து, “ஐயா, ஒரு சின்ன தப்பு நடந்துடுச்சு, டிரக் லேசா கவிழ்ந்துடுச்சு” என்று மிகச் சாதாரணமாகக் கூறுவார். இந்த வேடிக்கையான உரையாடல் பலரையும் சிரிக்க வைத்ததுடன், இது உண்மையா அல்லது திட்டமிடப்பட்டதா என்ற விவாதத்தையும் கிளப்பியது.

இந்த வீடியோவில் டிரைவராக நடித்தவர் மத்திய பிரதேச மாநிலம் ரீவாவைச் சேர்ந்த மணீஷ் படேல் எனும் இளைஞர் ஆவார். பி.சி.ஏ பட்டதாரியான மணீஷ், கோவிட் லாக்டவுன் காலத்தில் பொழுதுபோக்கிற்காக வீடியோக்களை உருவாக்கத் தொடங்கி, இன்று 15 பேர் கொண்ட குழுவுடன் முழுநேர உள்ளடக்க உருவாக்குனராக மாறியுள்ளார்.

சமீபத்தில் வாரணாசிக்குச் சென்றுவிட்டுத் திரும்பும்போது, சாலையில் நிஜமாகவே ஒரு டிரக் கவிழ்ந்து கிடப்பதைக் கண்ட மணீஷ், அந்த டிரைவர் தனது நண்பர் என்பதால் அவரிடம் விவரம் கேட்டுவிட்டு, உரிமையாளரின் அனுமதியுடன் இந்த வீடியோவைப் படமாக்கியுள்ளார். இது திட்டமிடப்பட்ட வீடியோ என்றாலும், நிஜமான ஒரு விபத்து நடந்த இடத்தில் எடுக்கப்பட்டதால் பலரும் இதை உண்மை என நம்பினர்.

இந்த வீடியோ வைரலானதைத் தொடர்ந்து, பல பெரிய இசை நிறுவனங்கள் மற்றும் பிற கலைஞர்களிடம் இருந்து அவருக்கு அழைப்புகள் வரத் தொடங்கியுள்ளன. முறையான வேலையைத் தேடாமல், தனது திறமையையே வருமானமாக மாற்றிய மணீஷ் படேல், இன்று கிராமப்புற இளைஞர்களுக்கு ஒரு முன்னுதாரணமாகத் திகழ்கிறார்.