உத்தரப் பிரதேச மாநிலம் லக்னோ, கோமதி நகரில் அலிஞ்சைச் சேர்ந்த ரேகா வர்மா (37) என்ற பெண் மர்மமான முறையில் “உட்கார்ந்த நிலையில்” சடலமாக மீட்கப்பட்ட சம்பவம் பரபரப்பை ஏற்படுத்தியுள்ளது.

பிரேதப் பரிசோதனை அறிக்கையில் மரணத்திற்கான தெளிவான காரணம் தெரியவராத நிலையில், விஷம் கொடுக்கப்பட்டிருக்கலாம் என்ற சந்தேகத்தின் பேரில் காவல்துறையினர் தீவிர விசாரணை மேற்கொண்டு வருகின்றனர். தடயங்களைத் திசை திருப்பவே உடல் அமர்ந்த நிலையில் வைக்கப்பட்டதாகவும், உடலில் தாக்குதலுக்கு முந்தைய காயங்கள் இருப்பதாகவும் தகவல்கள் வெளியாகியுள்ளன.

ரேகாவின் குடும்பத்தினர் அளித்த புகாரின் பேரில் கொலை வழக்குப் பதிவு செய்யப்பட்டுள்ளது. உடலை அப்புறப்படுத்தப் பயன்படுத்தப்பட்ட ஆட்டோரிக்ஷாவைப் போலீசார் அடையாளம் கண்டுள்ளனர். மேலும், ரேகாவுடன் நெருங்கிய பழக்கம் கொண்ட ஒரு நபர் சந்தேகத்தின் பேரில் கைது செய்யப்பட்டு, அவரிடம் விசாரணை நடைபெற்று வருகிறது.

திருமணமாகாத ரேகா சமீபத்தில் நிலம் விற்றதால், அவரது நிதிப் பரிவர்த்தனைகள், தனிப்பட்ட உறவுகள் மற்றும் சொத்துப் பிரச்சினைகள் குறித்தும் கவனம் செலுத்தப்படுகிறது. சட்டம்-ஒழுங்கைக் கண்டித்து ஆம் ஆத்மி, சமாஜ்வாதி கட்சிகள் அரசுக்கு கண்டனம் தெரிவித்துள்ளன.