புதிய வருமானவரி மசோதா 2025, எந்த எதிர்க்கட்சி விவாதமும் இல்லாமல் மக்களவையில் நேற்று நிறைவேற்றப்பட்டது. இது வருமானவரி சட்டம், 1961-க்கு பதிலாக கொண்டு வரப்பட்டதாகும். ஏப்ரல் 1, 2026 முதல் அமலுக்கு வரும் இந்த மசோதா, பழைய சிக்கலான வரி அமைப்பை சுமார் 50% எளிதாக்குகிறது. புதிய மசோதா எந்த புதிய வரிகளையும் விதிக்காது; தற்போதுள்ள வரி அடுக்குகள், விகிதங்கள், ஐடிஆர் தாக்கல் தேதிகள் மற்றும் மூலதன ஆதாயங்களில் மாற்றமில்லை.

மசோதாவில், பிரிவு 80M, குறைந்தபட்ச மாற்று வரி (MAT), மாற்று குறைந்தபட்ச வரி (AMT) மற்றும் அரசு சாரா நிறுவனங்களுக்கான வரி விதிகளில் முக்கிய மாற்றங்கள் செய்யப்பட்டுள்ளன. புதிய வரி முறையை தேர்வு செய்கின்ற நிறுவனங்களுக்கு, முந்தைய பிரிவு 80M கீழ் விலக்குகள் கிடைக்கும். MAT மற்றும் AMT விதிகள் தனித்தனி பகுதிகளாக பிரிக்கப்பட்டுள்ளன. மேலும், ‘முந்தைய ஆண்டு’ மற்றும் ‘மதிப்பீட்டு ஆண்டு’ என்பதற்குப் பதிலாக ‘வரி ஆண்டு’ என்ற ஒரே கருத்து பயன்படுத்தப்படும். TDS திருத்த அறிக்கைகளை தாக்கல் செய்யும் கால அவகாசம் 6 ஆண்டுகளில் இருந்து 2 ஆண்டுகளாக குறைக்கப்பட்டுள்ளது.

புதிய மசோதா படி, நிறுவனங்களுக்கு இடையேயான ஈவுத்தொகையில் ரூ.80 லட்சம் வரை விலக்கு வழங்கப்படும். பதிவுசெய்யப்பட்ட நிறுவனங்கள், புதிய சொத்துகளில் மூலதன ஆதாயங்களை மீண்டும் முதலீடு செய்தால், அது வருமான பயன்பாடாக கருதப்படும். மத மற்றும் தொண்டு நிறுவனங்களுக்கு வழங்கப்படும் பெயரில்லா நன்கொடைகளுக்கு தொடர்ந்தும் வரிவிலக்கு அமலும். மக்கள் மற்றும் நிறுவனங்களுக்கு எளிமையான வரி அமைப்பை உருவாக்குவதே இந்த மசோதாவின் முக்கிய நோக்கமாக அரசால் தெரிவிக்கப்பட்டுள்ளது.