கேரள மாநிலம் கோட்டயம் மாவட்டம் ராமாபுரத்தைச் சேர்ந்த அசோகன் (வயது 55) என்பவர், ராமாபுரம் பஸ்நிலையம் அருகே ஒரு நகைக்கடை நடத்தி வந்தார். இந்நிலையில், அதே பகுதியைச் சேர்ந்த துளசி தாசனுடன் அவருக்கு கடந்த சில காலமாக பணம் தொடர்பான விரிசல் நிலவி வந்ததாக கூறப்படுகிறது.

இந்த நிலையில், ஜூலை 19  மாலை துளசி தாசன் அசோகனின் கடைக்குச் சென்று, “தர  வேண்டிய பணத்தை கொடுங்கள்” எனக் கேட்டு வலியுறுத்தியதாக தெரிகிறது. இதையடுத்து இருவருக்கும் இடையே கடும் வாக்குவாதம் ஏற்பட்டது. வாக்குவாதம் உச்சத்தை எட்டியபோது, துளசி தாசன் தன்னிடம் பதுக்கி வைத்திருந்த பெட்ரோலை அசோகன் மீது ஊற்றி தீவைத்துவிட்டார். திடீரென தீ பற்றிய அசோகன், அலறி துடித்த நிலையில் அருகில் இருந்தவர்கள் விரைந்து வந்து தீயை அணைத்தனர்.

உடல் முழுவதும் தீக்காயங்களுடன் படுகாயமடைந்த அசோகன் கோட்டயம் அரசு மருத்துவமனையில் அனுமதிக்கப்பட்டார். ஆனால் தீவிர சிகிச்சை அளித்தும், அவரது உயிரை காப்பாற்ற முடியவில்லை. இன்று அவர் சிகிச்சை பலனின்றி உயிரிழந்தார். சம்பவத்திற்கு பிறகு தப்பிச் சென்ற துளசி தாசன், பிறகு போலீசில் தன்னைத்தானே சரணடைந்தார். அவரை கைது செய்த போலீசார் விசாரணை நடத்தி வருகின்றனர்.

இதையடுத்து,  மற்றொரு சம்பவமாக, நிலத்தகராறில் ஒரு பக்கத்து வீட்டுக்காரர், கணவன்-மனைவியை உயிருடன் பெட்ரோல் ஊற்றி எரித்த சம்பவமும் அதே மாநிலத்தில் பதிவு செய்யப்பட்டுள்ளது. அவர்கள் தற்போது 60% தீக்காயங்களுடன் சிகிச்சையில் அனுமதிக்கப்பட்டுள்ளனர். 24 மணி நேரத்திற்குள் 2 தீவைத்துக் கொலை முயற்சிகள் நடந்துள்ளன என்பது, கேரளாவில் பெரும் அதிர்ச்சியையும் கலக்கத்தையும் ஏற்படுத்தியுள்ளது.