ஈரோடு மாவட்டம் நம்பியூரில் செயல்பட்டு வரும் அரசு ஆண்கள் மேல்நிலைப்பள்ளியில், கடந்த சில நாட்களுக்கு முன் நடைபெற்ற விழாவில் ஏற்பட்ட சர்ச்சை காரணமாக, அந்த பள்ளியின் தலைமை ஆசிரியர் ஆனந்தராஜ் இடமாற்றம் செய்யப்பட்டுள்ளார். இந்த பள்ளி கடந்த 75 ஆண்டுகளாக பல மாணவர்களுக்கு கல்வி வழங்கி வருகிறது. சமீபத்தில், சட்டமன்ற உறுப்பினர் நிதியில் வகுப்பறைகளுக்கு வழங்கப்பட்ட இருக்கைகள் பற்றிய விழா நடைபெற்றது. இதில், முன்னாள் அமைச்சர் மற்றும் எம்எல்ஏ கே.ஏ. செங்கோட்டையன் பங்கேற்றார்.
விழாவில் பேசிய தலைமை ஆசிரியர் ஆனந்தராஜ், “செங்கோட்டையன் தொடர்ந்து 40 ஆண்டுகளாக எம்எல்ஏ ஆக உள்ளார். அவரை வெல்ல இங்கு யாரும் இல்லை” என பாராட்டினார். மேலும், மத சார்ந்த பாடல்களை ஒலிபரப்பி, மாணவிகளை அதைப் பாடச் சொல்லியதாகவும் புகார் எழுந்தது. இந்த வீடியோ காட்சிகள் சமூக வலைதளங்களில் வைரலான நிலையில், பலர் கடும் விமர்சனங்களை பதிவு செய்தனர். இதையடுத்து, கல்வி துறையின் உள் விசாரணை நடைபெற தொடங்கியது.
விவகாரம் பெரிதாக்கியதை அடுத்து, ஈரோடு மாவட்ட முதன்மை கல்வி அலுவலர் சுப்பாராவ் தலைமையில் அதிகாரிகள் நேரில் பள்ளிக்கு சென்று விசாரணை மேற்கொண்டனர். விசாரணையின் பின்னர், ஆனந்தராஜ் இடமாற்றம் செய்யப்படும் என முடிவு செய்யப்பட்டு, பவானி அருகே உள்ள தொட்டம்பாளையம் அரசு மேல்நிலைப்பள்ளிக்கு பணியிட மாற்றம் செய்யப்பட்டுள்ளார். அரசுப்பள்ளிகளில் அரசியல் மற்றும் மதவாத செயல்கள் கண்டிப்பாக அனுமதிக்கப்படமாட்டாது என்று அதிகாரிகள் தெரிவித்தனர்.
