எவரெஸ்ட் சிகரத்தின் ‘டெத் ஜோன்’ பகுதியில் சுமார் மூன்று தசாப்தங்களாகக் கிடக்கும் ‘கிரீன் பூட்ஸ்’ என்று அழைக்கப்படும் மர்மமான உடல், தற்போது மீண்டும் உலக நாடுகளின் கவனத்தை ஈர்த்துள்ளது.

இந்த உடலின் அடையாளத்தை உறுதிப்படுத்தவும், அதை அங்கிருந்து மீட்டுக் கொண்டு வரவும் இந்திய-திபெத் எல்லைக் காவல் படை சிறப்பு நடவடிக்கைகளைத் தொடங்கியுள்ளது. சுமார் 27,000 அடி உயரத்தில் உள்ள இந்த உடலை மீட்பது சாதாரணமான காரியமல்ல என்பதால், அனுபவம் வாய்ந்த 10 பேர் கொண்ட குழு இதற்காகத் தயார் செய்யப்பட்டு வருகிறது.

அக்டோபர் மாதத்திற்குள் உடலை டெல்லிக்குக் கொண்டு வருவதுதான் இவர்களின் இலக்காக உள்ளது, ஆனால் மோசமான வானிலை காரணமாக இது மிகவும் சவாலான மற்றும் ஆபத்தான பணியாகக் கருதப்படுகிறது.

ஆரம்பத்தில் இந்த உடல் 1996-ஆம் ஆண்டு எவரெஸ்ட் பயணத்தின் போது உயிரிழந்த ஐடிபிபி வீரர் த்சேவாங் பால்ஜோர் உடையது என்று நம்பப்பட்டது. ஆனால், சமீபத்திய டிஎன்ஏ பரிசோதனைகள் இந்த மர்மத்திற்கு ஒரு புதிய திருப்பத்தைக் கொடுத்துள்ளன; அந்த உடல் அதே பயணத்தின் போது உயிரிழந்த மற்றொரு வீரரான டோர்ஜே மோருப் உடையது என்று தெரியவந்துள்ளது.

இந்த மீட்புப் பணி வெற்றியடைந்தால், பல ஆண்டுகளாக எவரெஸ்ட் வரலாற்றில் நீடித்து வந்த இந்த மர்மமான கேள்விக்கு முற்றுப்புள்ளி விழுவதுடன், 1996-ஆம் ஆண்டு நடந்த அந்த சோகமான பயணத்தின் பின்னணியில் உள்ள உண்மைத் தகவல்களும் வெளிச்சத்திற்கு வரும் என்று எதிர்பார்க்கப்படுகிறது.