இந்தியாவைச் சேர்ந்த பெரியசாமி மதியழகன் என்பவர் தனது வங்கிக் கணக்கில் தவறாக மாற்றப்பட்ட SGD 25,000 (ரூ. 16 லட்சம்) தொகையை திரும்பக் கொடுக்காமல், தன் சொந்த தேவைகளுக்கு பயன்படுத்தியதாக குற்றம் சாட்டப்பட்டுள்ளார். சிங்கப்பூர் நீதிமன்றம் இந்த வழக்கில் அவர் குற்றத்தை ஒப்புக்கொண்டதைத் தொடர்ந்து 9 வார சிறைத் தண்டனை விதித்துள்ளது.

2023-ஆம் ஆண்டு ஏப்ரல் மாதம், பெரியசாமி பணிபுரிந்த பிளம்பிங் மற்றும் இன்ஜினியரிங் நிறுவனத்தின் நிர்வாகி பெண் ஒருவர் தவறாக SGD 25,000-யை பெரியசாமியின் வங்கிக் கணக்கிற்கு மாற்றினார். அதைத் திரும்பப் பெற அவரால் உடனடியாக முயற்சி மேற்கொள்ளப்பட்டது. இதற்காக வங்கியிடம் அவர் உதவி கேட்டபோது, பெரியசாமிக்கு பணத்தை திருப்பித் தருமாறு வங்கி கோரிக்கை விடுத்தது.

பெரியசாமி, அந்த பணத்தைத் திருப்பி செலுத்துவதற்கு அவகாசம் கேட்டார். மேலும், SGD 1,500 மாதாந்திரமாக வழங்குவதாகவும் கூறினார். எனினும், இதுவரை அவர் எந்தவிதத் தொகையையும் திருப்பி செலுத்தவில்லை. இதனால், 2023 ஆம் ஆண்டு மே மாதம் அந்தப் பெண் காவல்துறையில் புகார் அளித்தார்.

நீதிமன்ற விசாரணையின் போது, பெரியசாமி, அந்தத் தொகையைத் தனது கடன்களை அடைப்பதற்காகவும், இந்தியாவில் உள்ள தனது குடும்பத்திற்கு உதவுவதற்காகவும் பயன்படுத்தியதாக கூறினார். அவர் பணத்தை திருப்பி கொடுக்காவிட்டதால், சிங்கப்பூர்  சட்டம் கடுமையாக செயல்பட்டது. இவ்வழக்கின் முடிவில், பெரியசாமி மதியழகனுக்கு 9 வார சிறைத் தண்டனை விதிக்கப்பட்டுள்ளது.