நடப்பு டி20 உலகக் கோப்பை தொடரின் சூப்பர்-8 சுற்றில், பாகிஸ்தான் அணியின் அரையிறுதி வாய்ப்பு தற்போது மற்ற அணிகளின் வெற்றி தோல்வியைச் சார்ந்து ஊசலாடிக்கொண்டிருக்கிறது. இந்நிலையில், பாகிஸ்தான் அணியால் அரையிறுதிக்கு முன்னேற முடியாது என இந்திய அணியின் முன்னாள் அதிரடி ஆட்டக்காரர் வீரேந்தர் சேவாக் அதிரடியாகத் தெரிவித்துள்ளார்.

வெள்ளிக்கிழமை கொழும்பில் நடைபெற்ற போட்டியில் இங்கிலாந்து அணி, நியூசிலாந்தை வீழ்த்தியதன் மூலம் பாகிஸ்தானுக்கான ஒரு சிறிய கதவு திறக்கப்பட்டது. எனினும், இலங்கைக்கு எதிராக நடைபெறவுள்ள போட்டியில் பாகிஸ்தான் ஒரு ‘மிராக்கிள்’ எனப்படும் அதிசயத்தைச் செய்ய வேண்டிய கட்டாயத்தில் உள்ளது.

பாகிஸ்தான் அணி அரையிறுதிக்குத் தகுதி பெற வேண்டுமானால் முதலில் பேட்டிங் செய்து 160 ரன்கள் எடுத்தால், இலங்கையை குறைந்தது 65 ரன்கள் வித்தியாசத்தில் வீழ்த்த வேண்டும். ஒருவேளை இலக்கைத் துரத்தினால், அதே ரன்களை வெறும் 13.2 ஓவர்களிலேயே எட்ட வேண்டும். பாகிஸ்தானின் இந்த வெற்றி வாய்ப்பு குறித்து ஒரு விவாதத்தில் பங்கேற்ற சேவாக், மிகவும் எதார்த்தமாகப் பதிலளித்தார். “இது நடக்கப்போவதில்லை, அடுத்த வேலையைப் பாருங்கள்” என்று அவர்  கூறிவிட்டார்.

அதாவது சாதாரணச் சூழலிலேயே 160 ரன்கள் எடுக்கத் திணறும் பாகிஸ்தான் பேட்ஸ்மேன்கள், அந்த ரன்களை 14 ஓவர்களுக்குள் எப்படி எடுப்பார்கள்? என்று அவர் கேள்வி எழுப்பியுள்ளார். “கடந்த சில காலமாகவே பாகிஸ்தானுக்கு அவர்களது பிரார்த்தனைகள் கைகொடுக்கவில்லை. இலங்கைக்கு எதிராகவும் அது பலிக்காது” என அவர் கிண்டலாகக் குறிப்பிட்டார். இலங்கை அணி 90 ரன்களுக்குள் ஆல்-அவுட் ஆனால் மட்டுமே பாகிஸ்தான் தகுதி பெற முடியும், ஆனால் அதற்கான வாய்ப்பு மிகக் குறைவு என அவர் சுட்டிக்காட்டினார்.

சூப்பர்-8 சுற்றின் குரூப்-2 பிரிவில், இங்கிலாந்து அணி ஏற்கனவே முதலிடம் பிடித்து அரையிறுதிக்குத் தகுதி பெற்றுவிட்டது. இரண்டாவது இடத்திற்கு நியூசிலாந்து மற்றும் பாகிஸ்தான் இடையே கடும் போட்டி நிலவுகிறது. இரண்டு அணிகளும் சமமான புள்ளிகளைப் பெற்றாலும், நியூசிலாந்தின் ரன் ரேட்  மிகவும் சிறப்பாக உள்ளது. மேலும் பாகிஸ்தான் அணியின் நடுத்தர வரிசை பேட்டிங் இந்தத் தொடர் முழுவதும் மோசமாக உள்ள நிலையில், சேவாக்கின் இந்தக் கணிப்பு சமூக வலைதளங்களில் வைரலாகி வருகிறது.