இன்றைய  சமூகத்தில், படித்து முடித்துவிட்டுக் கார்ப்பரேட் நிறுவனங்களின் குளிரூட்டப்பட்ட அறைகளில் 12 மணி நேரத்திற்கும் மேலாக ரத்தம் சிந்தி உழைக்கும் பல இளைஞர்களின் நிலைமை மிகவும் பரிதாபகரமானது. அதிகரித்து வரும் பணவீக்கத்திற்கு மத்தியில், சொற்பச் சம்பளத்தை வைத்துக்கொண்டு குடும்ப நடத்த முடியாமல் தவிக்கும் சாமானியர்களின் கதைகள் ஏராளம்.

ஆனால், அந்தப் போலி கௌரவத்தின் முகத்திரையைக் கிழித்து, “என் உழைப்பிற்கு ஏற்ற ஊதியமும், என் சுதந்திரமும்தான் எனக்கு முக்கியம்!” என்று நிரூபித்துக் காட்டியிருக்கிறார் காசியாபாத்தைச் சேர்ந்த 23 வயது இளம் பெண் நேஹா சர்மா.

12-ஆம் வகுப்பு வரை மட்டுமே படித்த நேஹா, தன் குடும்பத்தின் வறுமையைப் போக்குவதற்காக ஒரு தனியார் நிறுவனத்தில் வேலையில் சேர்ந்தார். ஆனால், அங்கே அவருக்குக் காத்திருந்தது கடுமையான உழைப்புச் சுரண்டல் மட்டுமே.

காலை முதல் இரவு வரை 12 மணி நேரம் ஓயாமல் உழைத்தும், மாதக்கடையில் அவரது கைக்கு வந்த சம்பளம் வெறும் ₹15,000 மட்டுமே! அந்தச் சொற்ப வருமானத்தில் குடும்பச் செலவுகளையும் சமாளிக்க முடியாமல், தன் சொந்தத் தேவைகளையும் பூர்த்தி செய்ய முடியாமல் அவர் மனதளவில் உடைந்தே போனார்.

அப்போதுதான் அவர் அந்த அதிரடி முடிவை எடுத்தார் — “என் நேரத்தையும் உழைப்பையும் உறிஞ்சும் இந்த வேலையை இனி செய்யப் போவதில்லை!”

வேலையை விட்டு வெளியேறிய நேஹா, நவீன தொழில்நுட்பத்தின் கதவுகளைத் தட்டினார். ஒரு ஆப் (App) அடிப்படையிலான வீட்டுச் சேவைத் தளத்தில் (Home Services Platform) தன்னைப் பதிவுக் செய்து கொண்டார். வீடுகளைச் சுத்தம் செய்தல், பெருக்கித் துடைத்தல், பாத்திரங்களைக் கழுவுதல் மற்றும் சமையலறைச் சிறு பணிகளைச் செய்யும் வேலையைத் தொடங்கினார்.

ஆரம்பத்தில் “வீடு வீடாகச் சென்று துடைக்கும் வேலையா?” என்று உலகம் பார்த்திருக்கலாம். ஆனால், அந்த உழைப்பிற்கு கிடைத்த பலன் அனைவரையும் ஆச்சரியத்தில் ஆழ்த்தியது!

இப்போது நேஹா மாதம் ₹30,000 முதல் ₹35,000 வரை மிக கம்பீரமாகச் சம்பாதிக்கிறார்.

“தினசரி நிலையான ஊதியம், வார இறுதி நாட்களில் கூடுதல் பணிக்குக் கூடுதல் சம்பளம், சிறப்பாக வேலை செய்தால் ஊக்கத்தொகை (Bonus) என என் உழைப்புக்கு ஏற்ற பலன் நேரடியாக என் கைக்கு வருகிறது. எல்லாவற்றிற்கும் மேலாக, தேவைப்படும்போது விடுமுறை எடுத்துக்கொண்டு என் சொந்த ஊருக்குச் சென்று வரும் சுதந்திரம் இதில் இருக்கிறது!” என்று பெருமிதத்தோடு கூறுகிறார் நேஹா.

எந்த ஒரு தொழிலிலும் சவால்கள் இல்லாமல் இல்லை. சில வாடிக்கையாளர்கள் கூடுதல் வேலைகளைக் கேட்டு அழுத்தம் தருவதும், செயலி மதிப்பீடுகளைக்  காட்டிப் பயமுறுத்துவதும் உண்டு. ஆனால், நேஹாவின் நேர்மையான உழைப்பைக் கண்டு திருப்தியடைந்து, அவருக்கு அன்பளிப்புகளையும்  கனிவான வார்த்தைகளையும் வழங்கும் நல்ல மனிதர்களும் இருக்கவே செய்கிறார்கள்.

இன்று நேஹாவைப் போலப் பல பெண்கள், சுயமரியாதையோடு தன் சொந்தக் காலில் நின்று தங்களின் குடும்பத்தைக் காப்பாற்றி வருகிறார்கள்.

வேலை என்பது ஏசி அறையில் அமர்ந்து பார்க்கப்படுகிறதா அல்லது கையால் பெருக்கித் துடைக்கப்படுகிறதா என்பதில் இல்லை அதன் மதிப்பு; அந்த வேலை ஒரு மனிதனுக்குக் கொடுக்கும் சுதந்திரத்திலும், சுயமரியாதையிலும், தகுந்த ஊதியத்திலும்தான் இருக்கிறது.

12 மணி நேர அடிமைத்தனத்தை உடைத்து எறிந்துவிட்டு, தன் உழைப்பையே முதலீடாக்கி, இன்று மாதம் ₹35,000 சம்பாதிக்கும் நேஹா சர்மா, இந்தச் சமூகத்தின் அத்தனை உழைக்கும் பெண்களுக்கும் ஒரு புதிய வழிகாட்டி! உழைப்பிற்கு ஏது தாழ்வு?