சென்னை கீழ்ப்பாக்கத்தில் உள்ள தனியார் வங்கி ஒன்றிற்குள் புகுந்து, பிரிந்து வாழும் மனைவியை கணவனே சரமாரியாகக் கத்தியால் குத்திய சம்பவம் பெரும் அதிர்ச்சியையும் அதிர்வலைகளையும் ஏற்படுத்தியுள்ளது.

​சென்னை கீழ்ப்பாக்கத்தைச் சேர்ந்த ரெபேக்கா என்பவரை, அவரது கணவர் சதீஷ் என்பவர் கடந்த ஆண்டு கடுமையாகத் தாக்கினார். இந்த வழக்கில் கைதாகி ஜாமினில் வெளியே வந்த சதீஷ், தனது 7 வயது மகளைக் கொடூரமாகக் கொலை செய்தார். மகளைப் பறிகொடுத்த அதிர்ச்சியிலும், கணவனின் கொடூரப் போக்கைக் கண்டும் அஞ்சிய ரெபேக்கா, ஜாமினில் மீண்டும் வெளியே வரத் துடிக்கும் சதீஷால் தனது உயிருக்கு ஆபத்து இருப்பதாகக் காவல் நிலையத்தில் ஏற்கனவே புகார் அளித்திருந்தார்.

​இந்நிலையில், மீண்டும் ஜாமினில் வெளியே வந்த சதீஷ், கீழ்ப்பாக்கத்தில் உள்ள தனியார் வங்கியில் பணிபுரிந்து வந்த ரெபேக்காவைத் தேடிச் சென்றுள்ளார். அங்கு வங்கிக்குள் புகுந்து, அனைவரும் பார்த்திருக்க மனைவியை சரமாரியாகக் கத்தியால் குத்தித் தப்பியோட முயன்றார். ரத்த வெள்ளத்தில் சரிந்த ரெபேக்காவை அங்கிருந்தவர்கள் மீட்டு மருத்துவமனையில் சேர்த்தனர். 7 வயது மகளைப் பலிகொடுத்து ஜாமினில் வந்த நபர், மீண்டும் மனைவியைக் கொலை செய்ய முயன்ற இந்த வெறிச்செயல் அப்பகுதியில் கடும் பீதியையும் கொந்தளிப்பையும் ஏற்படுத்தியுள்ளது.